استانادا بوپسالاۋمەن اينالىسقان قىلمىستىق توپتاردىڭ ارەكەتى توقتاتىلدى
استانا. KAZINFORM - استانا قالالىق پوليتسياسىنىڭ جەدەل ءىس- شارالارىنىڭ ناتيجەسىندە ەلىمىزدىڭ ءارتۇرلى وڭىرىنەن قىلمىستىق جولمەن بايۋ ماقساتىندا كەلگەن بىرنەشە قىلمىستىق توپتىڭ ارەكەتى توقتاتىلدى، دەپ حابارلايدى Polisia.kz.
ماۋسىم ايىنىڭ باسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بوپسالاۋ جانە الاياقتىق ارەكەتتەرگە قاتىسى بار ءۇش ۇيىمداسقان توپتىڭ مۇشەلەرىن ۇستادى. ولار ەلوردا اۋماعىندا زاڭسىز ارەكەتتەردى جۇزەگە اسىرۋعا تىرىسقانى انىقتالدى.
- ءبىر ەپيزودتا كۇدىكتىلەر ازاماتتاردى قارۋ قولدانامىز دەپ قورقىتىپ، 10 ميلليون تەڭگەگە دەيىن اقشا بوپسالاعان.
تاعى ءبىر جاعدايدا قالاداعى بازارلاردىڭ بىرىندە كاسىپكەرلەردەن جۇيەلى تۇردە اقشا بوپسالاۋ ارقىلى ولاردىڭ قىزمەتىنە كولەڭكەلى باقىلاۋ ورناتپاق بولعان.
تەرگەۋ شارالارى بارىسىندا تراۆماتيكالىق جانە سۋىق قارۋ، وق-دارىلەر، سونداي-اق قىلمىستىق سحەمالاردا قولدانىلعان بولۋى مۇمكىن ميكروكارجى ۇيىمدارىنىڭ قۇجاتتارى تاركىلەندى. بارلىق كۇدىكتىلەر قاماۋعا الىندى. تەرگەۋ امالدارى جۇرگىزىلۋدە، - دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
