استانادا بانك قىزمەتكەرى ۇلتتىق قاۋىپسىزدىك كوميتەتىنىڭ ارنايى وپەراتسياسىن بۇلدىرگەن

استانا. KAZINFORM - ەلوردادا سوتقا دەيىنگى تەرگەپ-تەكسەرۋ جۇرگىزۋگە كەدەرگى جاساۋ فاكتىسى بويىنشا بانك قىزمەتكەرىنە قاتىستى ءىس قارالدى (قىلمىستىق كودەكستىڭ 407-بابىنىڭ 3-بولىگى).

استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ حابارلاۋىنشا، ب. ءوزىنىڭ قىزمەتتىك مىندەتتەرىن اتقارۋ كەزىندە، سوتقا دەيىنگى تەرگەۋدەن تۇسكەن ساۋالدا تانىسى تۋرالى مالىمەتتى كورگەن. كەيىن ول تانىسى ك. -گە قوڭىراۋ شالىپ، قىلمىستىق ءىس بويىنشا ونىڭ تۋىسىنا قاتىستى كەلىپ تۇسكەن مالىمەتتەن حاباردار ەتكەن.

ب-نىڭ (بانك قىزمەتكەرى) ارەكەتى سالدارىنان ۇلتتىق قاۋىپسىزدىك ورگاندارىنىڭ استانا قالاسىنا اتىس قارۋى مەن وق-دارىلەردى جەتكىزۋ جولىن كەسۋگە باعىتتالعان ارنايى وپەراتسيانىڭ بۇزىلۋىنا جول بەرىلدى.

«ب. ءوزىنىڭ قىزمەتتىك جاعدايىن پايدالانا وتىرىپ، سوتقا دەيىنگى تەرگەپ-تەكسەرۋدى جۇزەگە اسىراتىن ادامنىڭ قىزمەتىنە قاساقانا ارالاسقان. بۇل ۇلتتىق قاۋىپسىزدىك ورگاندارىنىڭ قىلمىستىق ءىستىڭ الدىن الۋعا باعىتتالعان وپەراتسياسىنىڭ جۇزەگە اسۋىنا قاۋىپ ءتوندىردى. سوت تالقىلاۋى بارىسىندا سوتتالۋشى كىناسىن مويىندامادى، قورعاۋشى تاراپ ونى اقتاۋدى سۇرادى»، - دەلىنگەن سوت تاراتقان اقپاراتتا.

سونداي-اق، سوتتالۋشىنىڭ جاس بالالارىنىڭ بولۋى قىلمىستىق جاۋاپتىلىق پەن جازانى جەڭىلدەتەتىن ءمان-جاي رەتىندە تانىلعان جانە قىلمىستىق جاۋاپتىلىق پەن جازانى اۋىرلاتاتىن ءمان-جاي انىقتالماعان.

«سوتتالۋشىنىڭ كىناسى كۋاگەرلەردىڭ ايعاعىمەن، سوت ساراپتامالارى جانە مامانداردىڭ قورىتىندىسىمەن دالەلدەندى. سوت ۇكىمىمەن ب. 1 جىل مەرزىمگە بانك قىزمەتى سالاسىندا بەلگىلى ءبىر لاۋازىمدى اتقارۋ قۇقىعىنان ايىرىلا وتىرىپ، 1 جىلعا باس بوستاندىعى شەكتەلدى»، - دەيدى قالالىق سوتتان.

ۇكىم زاڭدى كۇشىنە ەنگەن جوق.

اۆتور
داۋلەت ىزتىلەۋ