استانادا ايازعا بايلانىستى تەگىن تاكسي ۇيىمداستىرىلىپ، ىستىق تاماق تاراتىلدى
ايازدى اۋا رايىنا بايلانىستى ەلوردالىق مەشىتتەر «10 يگى ءىس» اكسياسىن قولداپ، ادامداردى تەگىن تاسىمالدايدى جانە كوممۋنالدىق قىزمەت ماماندارىن ىستىق تۇسكى اسپەن قامتاماسىز ەتەدى، دەپ حابارلايدى Kazinform اكىمدىككە سىلتەمە جاساپ.
تاۋەلسىزدىك كۇنى قارساڭىندا ەلوردادا «10 يگى ءىس» ۇرانىمەن الەۋمەتتىك قايىرىمدىلىق ءىس-شارالارى ءوتىپ جاتىر.
باستى ماقسات - قالا مەن ونىڭ تۇرعىندارى ءۇشىن يگى ءىس جاساۋ.
«مۇنداي اكسيالاردى وتكەن جىلدارى دا ۇيىمداستىرعانبىز. استانانىڭ ايازدى كۇندەرىندە ازاماتتارىمىزعا كومەك قولىن سوزعىمىز كەلەدى. وزگە جۇرگىزۋشىلەردى اكسياعا قوسىلۋعا جانە تۇرعىندارعا كومەكتەسۋگە شاقىرامىز»، - دەپ اتاپ ءوتتى استانانىڭ باس يمامى ەربولات ءجۇسىپوۆ.
ەستەرىڭىزگە سالا كەتەيىك، وسىعان دەيىن ەلوردالىق ەرىكتىلەر تۇرعىندارعا ىستىق شاي مەن باۋىرساق تاراتۋ اكسياسىن باستاعان بولاتىن.
ولار ايالداما كەشەندەرىن ارالاپ، اۆتوبۋس سالوندارىندا كوندۋكتورلارعا، جۇرگىزۋشىلەرگە جانە جولاۋشىلارعا ىستىق شاي مەن باۋىرساق تاراتقان.
قالا تۇرعىندارى ەستافەتاعا قولداۋ كورسەتە الادى، سول سياقتى ىزگىلىك اكسياسى اياسىندا ءوز اككاۋنتتارىندا #مەيىرىمدىبولۋادەت، #دوبروتاوبرازجيزني #مودنوبىتدوبرىم حەشتەگىمەن اقپاراتتار نەمەسە ۆيدەولار جاريالاي الادى.
بۇل كۇندەرى استانادا سارشۇناق اياز كۇشەيىپ تۇر. اۋا تەمپەراتۋراسى 30- گرادۋس ايازدى كورسەتىپ تۇر.
قالا تۇرعىندارى مەن قوناقتارى اباي بولعانى، جاراقات الىپ، ۇسىك شالماس ءۇشىن كوشەدە ۇزاق ۋاقىت جۇرمەگەنى ءجون.
