استانادا اۆتوبۋس اپاتى بولدى: 10 ادام زارداپ شەكتى، بىرەۋىنىڭ جاعدايى اۋىر، وتا جاسالادى

استانا. KAZINFORM - استانادا اۆتوبۋس جۇرگىزۋشىسى رولگە يە بولا الماي، جول جيەگىندەگى باعانعا سوعىلدى. وقىس وقيعانىڭ ءمان-جايىن قالالىق پوليتسيا دەپارتامەنتى انىقتاپ جاتىر.

- رەسپۋبليكا داڭعىلى بويىندا جولاۋشىلار اۆتوبۋسى جول اپاتىنا ۇشىرادى. الدىن الا مالىمەت بويىنشا، اۆتوبۋس جۇرگىزۋشىسى مانەۆر جاساۋ(اينالىپ ءوتۋ) كەزىندە كولىكتى باسقارا الماي، باعاناعا سوعىلعان. جول اپاتى سالدارىنان زارداپ شەككەندەر بار. زارداپ شەككەن جاندارعا جەدەل مەديتسينالىق كومەك كورسەتىلىپ جاتىر، - دەلىنگەن حابارلامادا.

اتالعان فاكتى بويىنشا دەرەۋ قىلمىستىق ءىس قوزعالدى. جان-جاقتى تەكسەرۋ جۇرگىزىلىپ، بارلىق ءمان-جاي انىقتالىپ جاتىر.

ءوز كەزەگىندە قالالىق دەنساۋلىق ساقتاۋ باسقارماسىنان زارداپ شەككەن جانداردىڭ جاعدايى تۋرالى اقپارات ءبىرازدان سوڭ حابارلايتىنى ەسكەرتىلگەن بولاتىن.

ايتا كەتەيىك، ەلوردادا جولاۋشىلار اۆتوبۋسى اپاتىنان 10 ادام زارداپ شەكتى. بۇل تۋرالى قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى حابارلايدى.

- الدىن الا مالىمەت بويىنشا، جاراقات العان 10 ادام قالالىق ستاتسيونارعا جەتكىزىلدى. زارداپ شەككەندەردىڭ ەكەۋى ۇلتتىق شۇعىل مەديتسينا ۇيلەستىرۋ ورتالىعىنا جەتكىزىلدى. ولارعا بارلىق قاجەتتى مەديتسينالىق كومەك كورسەتىلىپ جاتىر. زارداپ شەككەندەردىڭ ءبىرى اۋىر جاعدايدا، شۇعىل وپەراتسيا جاسالىپ جاتىر، - دەگەن حابار الدىق دەنساۋلىق ساقتاۋ باسقارماسىنان.

ەسكە سالساق، بۇل ءبىرىنشى جايت ەمەس، ساۋىردە استانادا اۆتوبۋس باعاناعا سوعىلىپ، جولاۋشىلار جاراقات العان ەدى.

تاياۋدا ەلوردادا كولىك باسقارىپ كەلە جاتقان جۇرگىزۋشى كەنەتتەن قايتىس بولعانى تۋرالى جازعان ەدىك.

اۆتور

داۋلەت ىزتىلەۋ