استانادا اۆتوبۋس 22 جاستاعى بويجەتكەندى قاعىپ، مەرت قىلدى

استانا. KAZINFORM - استانادا اۆتوبۋس جۇرگىزۋشىسى 22 جاستاعى بويجەتكەن قىزدى قاعىپ كەتتى. جاپا شەگۋشى العان جاراقاتىنان مەرت بولعان. بۇل تۋرالى استانا قالاسى پوليتسيا دەپارتامەنتىنىڭ باسپا ءسوز قىزمەتى حابارلادى.

«جۇبان مولداعاليەۆ كوشەسىندە مارشرۋتتىق اۆتوبۋستىڭ جۇرگىزۋشىسى بەلگىلەنبەگەن جەردەن ءوتىپ بارا جاتقان جاياۋ جۇرگىنشىنى قاعىپ كەتتى. العان جاراقاتتارىنىڭ سالدارىنان جاياۋ جۇرگىنشى كوز جۇمدى. اتالعان فاكتى بويىنشا قىلمىستىق ءىس قوزعالدى. تەكسەرۋ جۇرگىزىلۋدە. قىلمىستىق ءىس شەڭبەرىندە ءبىز كولىك باسقارماسىنا جول-كولىك وقيعالارىنىڭ تۋىنداۋىنا نەمەسە جاسالۋىنا ىقپال ەتەتىن ءمان-جايلاردى جويۋ تۋرالى ۇسىنىم جىبەرەتىن بولامىز»، - دەپ مالىمدەدى استانا قالاسى پوليتسيا دەپارتامەنتى انىقتاۋ باسقارماسى باستىعىنىڭ ورىنباسارى پوليتسيا پودپولكوۆنيگى اسەت سۇلەيمەنوۆ.

مەرت بولعان قىزدىڭ ەسىمى - كان لوليتا ەۆگەنيەۆنا. تۋىستارىنىڭ ايتۋىنشا، بۇل قايعىلى وقيعانىڭ بولۋىنا بىرنەشە جاعداي سەبەپ بولعان.

«وقيعا بولعان جەردە جاياۋ جۇرگىنشىگە ارنالعان جول جوق، جولدىڭ جيەگى قازىلىپ تاستالعان. ودان بولەك، كوشە جارىقتاندىرىلماعان. بۇل وقيعاعا قالالىق اكىمدىك تە، سول تۇرعىن ءۇيدى سالعان قۇرىلىس كومپانياسى دا جاۋاپ بەرۋى ءتيىس دەپ سانايمىز. سەبەبى جۇبانوۆ كوشەسىنىڭ سول اۋماقتاعى بولىگىندە اۆتوبۋس ايالداماسى دا جوق. لوليتا ءسان سالونىنان شىعىپ، ءبىر ورام (كۆارتال) جەردەگى ايالداماعا بەت العان. جولدا وسىنداي قايعىلى جاعدايعا تاپ بولدى»، - دەپ مالىمدەدى مارقۇمنىڭ جەزدەسى ابباس اپپازوۆ.

وقيعا 26-قازان كۇنى كەشكى ساعات 21:40 شاماسىندا بولعان. قىزدىڭ دەنەسى بۇگىن جەر قوينىنا تابىستالدى.

ايتا كەتەيىك، بۇعان دەيىن كەيىنگى 9 ايدا ەلوردادا جول اپاتى ەكى ەسە ۇلعايعانى تۋرالى جازعان ەدىك.