استانادا العاش رەت جەڭىل اتلەتيكادان الەمدىك جارىس وتەدى
استانادا World Athletics Indoor Tour Gold Label جەڭىل اتلەتيكا جارىسى وتەدى.
بۇل جارىس وليمپيادا ويىندارى مەن الەم چەمپيوناتتارىنا قاتىسۋ ءۇشىن ۇپاي جيناۋعا مۇمكىندىك بەرەدى، دەپ حابارلايدى قازاقپارات ءتىلشىسى.
الەمدىك جەڭىل اتلەتيكادان جابىق تۋر 2016 -جىلدان بەرى ءوتىپ كەلە جاتقان جابىق جەڭىل اتلەتيكا جارىستارى. بۇل سەريا «گاۋھار ليگاسى» ۇلگىسىندە جەڭىل اتلەتيكالىق جابىق جارىستاردىڭ بەدەلىن ارتتىرۋ ماقساتىندا جاسالعان. 2021 -جىلى World Athletics وسى جارىستاردىڭ التىن، كۇمىس جانە قولا دەڭگەيىن ۇسىندى. ولار جارىستى ۇيىمداستىرۋ دەڭگەيىمەن جانە جۇلدە قورىمەن ەرەكشەلەنەدى.
بيىل استانادا العاش رەت World Athletics Indoor Tour Silver Level جارىسى وتكەن ەدى. 2024 -جىلى استانا التىن دەڭگەيدەگى جارىستاردى وتكىزەدى. وسىلايشا، ەلوردا وليمپيادا ماۋسىمىن اشپاق. استانادان كەيىن بۇل جارىستار بوستون، ا ق ش (3-اقپان، 2024)، تورۋن، پولشا (6-اقپان، 2024)، ليەۆەن، فرانسيا (10-اقپان، 2024)، نيۋ-يورك، ا ق ش (11-اقپان، 2024)، مادريد، يسپانيا (22-اقپان، 2024)، بيرمينگەم، ۇلى بريتانيا (24-اقپان، 2024) قالالارىندا جالعاسىن تابادى.
World Athletics Indoor Tour Gold Label - سپورتشىلارعا وليمپيادا ويىندارى مەن الەم چەمپيوناتتارىنا قاتىسۋ ءۇشىن ۇپاي جيناۋعا مۇمكىندىك بەرەتىن ءبىر كۇندىك رەيتينگتىك جارىس. ۇپايلار ءار باعىت بويىنشا ءتورت ۇزدىك سپورتشىعا بەرىلەدى.
ق ر جەڭىل اتلەتيكا فەدەراتسياسىنىڭ اتقارۋشى ديرەكتورى پاۆەل كۋكيننىڭ ايتۋىنشا، استاناداعى تۋرنير 2024 -جىلدىڭ 27-قاڭتارىنا جوسپارلانعان.
«قازاقستان 2024 -جىلى INDOOR tour Gold LEVEL سەرياسىنىڭ جارىستارىن قابىلداۋعا دايىن. Astana meet for prizes of Amin Tuyakov تۋرنيرى وتاندىق جەڭىل اتلەتيكانىڭ جاڭا تاريحىن اشادى. قازاقستاندىق سپورتشىلار الەمدەگى ەڭ مىقتى سپورتشىلارمەن بىرگە جۇگىرۋ جولاعىنا شىعادى. ءتۋرنيردىڭ جۇلدە قورى 100 000 دوللارعا جەتەدى. جارىس جەڭىل اتلەتيكانىڭ 12 ءتۇرى بويىنشا وتەدى. قورىتىندى ناتيجەلەر قازاقستاندىق سپورتشىلارعا 2024 -جىلى پاريجدە وتەتىن وليمپيادا ويىندارىنا ليتسەنزيا الۋعا مۇمكىندىك بەرەدى»، - دەدى پ. كۋكين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سپيكەردىڭ ايتۋىنشا، مۇنداي دەڭگەيدەگى جارىستاردى وتكىزۋ قازاقستاندىق جەلاياقتاردىڭ الەۋەتىن پايدالانۋعا، حالىقتىڭ جەڭىل اتلەتيكاعا قىزىعۋشىلىعىن ارتتىرۋعا كومەكتەسەدى.
«سوڭعى 4 جىلدا قازاقستاندىق سپورتشىلار 60 تان استام رەكورد ورناتتى. بۇل وڭ ناتيجەنى كورسەتەدى، ۇلتتىق چەمپيوناتتارعا قاتىساتىن سپورتشىلار سانى %30 عا ءوستى. وسى فاكتىلەردىڭ بارلىعى قازاقستان جەڭىل اتلەتيكاسىن دامىتۋ جولىنىڭ تيىمدىلىگىن كورسەتەدى»، - دەدى پاۆەل كۋكين.
