استانادا احمەت بايتۇرسىن ۇلى مەن ماعجان جۇمابايەۆتىڭ جيناقتارى تانىستىرىلدى
استانا. KAZINFORM – ق ر ۇلتتىق اكادەميالىق كىتاپحاناسىندا الاش قايراتكەرلەرى احمەت بايتۇرسىن ۇلى مەن ماعجان جۇمابايەۆتىڭ كوپتومدىق اكادەميالىق شىعارمالار جيناقتارىنىڭ تۇساۋكەسەرى ءوتتى.
بۇل جيناقتار مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ دايىنداۋىمەن جانە تۇركى اكادەمياسىنىڭ قولداۋىمەن جارىق كورىپ وتىر.
جيىنعا مەملەكەت جانە قوعام قايراتكەرلەرى، عالىمدار مەن ديپلوماتيالىق ميسسيالاردىڭ باسشىلارى مەن وكىلدەرى جانە دەپۋتاتتار قاتىستى. ءوز سوزىندە تۇركى اكادەمياسىنىڭ پرەزيدەنتى شاھين مۇستافايەۆ احمەت بايتۇرسىن ۇلى مەن ماعجان جۇمابايەۆتىڭ تۇركى الەمى ءۇشىن تاريحي ءارى مادەني ماڭىزىنا توقتالدى.
«احمەت بايتۇرسىن ۇلى قازاق ءتىل ءبىلىمىنىڭ نەگىزىن قالاۋشى جانە ءالىپبي رەفورماتورى رەتىندە تۇركى عىلىمىنىڭ دامۋىنا باعا جەتپەس ۇلەس قوستى. ونىڭ ورتاق تۇركى تەرمينولوگياسى مەن ادەبي ءتىلدى قالىپتاستىرۋ تۋرالى يدەيالارى بۇگىنگى كۇنى دە وزەكتىلىگىن جوعالتقان جوق. ال ماعجان جۇماباي ۇلى ءوزىنىڭ شىعارماشىلىعىمەن ۇلتتىق سانانى وياتىپ، تۇركى الەمىنىڭ بىرلىگىن دارىپتەگەن ۇلى تۇلعا بولدى. ونىڭ «الىستاعى باۋىرىما» سىندى ولەڭدەرى باۋىرلاس حالىقتار ىنتىماعىنىڭ جارقىن ۇلگىسى سانالادى»، - دەدى اكادەميا باسشىسى.
سونىمەن بىرگە، شاھين مۇستافايەۆ الاش قايراتكەرلەرى كورەگەندىكپەن سەنگەن تۇركىستان يدەياسىنىڭ تاۋەلسىز تۇركى مەملەكەتتەرىنىڭ ينتەگراتسياسى داۋىرىندە دە ءوز ماڭىزىن ساقتاپ وتىرعانىن اتاپ ءوتتى.
ول بيىل قىركۇيەك ايىندا قابىلدانعان ورتاق تۇركى ءالىپبيىن احمەت بايتۇرسىن ۇلى مەن تۇركى الەمىنىڭ باسقا دا ۇلى اعارتۋشىلارىنىڭ اسىل مۇراتتارىنىڭ ورىندالۋى رەتىندە باعالاپ، تۇركى اكادەمياسىنىڭ مۇنداي ماڭىزدى باستاماعا ۇلەس قوسقانىن ۇلكەن مارتەبە سانايتىنىن جەتكىزدى.
ءىس-شارا بارىسىندا تۇركى اكادەمياسىنىڭ تۇركى الەمىنىڭ ۇلى تۇلعالارىنىڭ مۇراسىن زەرتتەۋگە جانە ناسيحاتتاۋعا باعىتتالعان ىرگەلى جوبالارى دا تانىستىرىلدى.
اكادەميانىڭ « ⅩⅨعاسىر مەن ⅩⅩ عاسىردىڭ باسىنداعى تۇركى اعارتۋشىلىعى: زيالىلاردىڭ ءومىرى مەن يدەيالارى» جوباسى اياسىندا ۇلتتىڭ وركەندەۋىنە قىزمەت ەتكەن ويشىلداردىڭ ءومىرباياندارى مەن يدەيالارى جيناقتالۋدا. كەلەر جىلى شوقان ءۋاليحانوۆتىڭ 190 جىلدىعىنا وراي ونىڭ تاڭداۋلى ەڭبەكتەرىن تۇرىك وقىرماندارىنا ۇسىنۋ جوسپارلانىپ وتىر.
سونىمەن بىرگە، تۇركى اكادەمياسىنىڭ پرەزيدەنتى جاس ۇرپاقتى ورتاق قۇندىلىقتاردى قۇرمەتتەۋگە تاربيەلەۋ ماقساتىندا جۇزەگە اسىرىلىپ جاتقان «تۇركى الەمىنىڭ تۇعىرلى تۇلعالارى» جوباسىنىڭ ماڭىزدىلىعىن ەرەكشە اتاپ ءوتتى.
