استانادا 49 ادام 82 ميلليون تەڭگەسىنەن ايىرىلىپ، سان سوعىپ قالدى

استانا. KAZINFORM - تابىستى كاسىپكەردىڭ كەيپىنە كىرگەن الاياق كليەنتتەرىن الداپ سوعىپ، رەسەي فەدەراتسياسىنان باسەكەگە قابىلەتتى باعامەن ەدەن ساتىپ الۋ مۇمكىندىگى بار دەپ جاڭىلىستىرعان. بۇل تۋرالى استانا قالاسىنىڭ پروكۋراتۋراسى ءمالىم ەتتى.

ازاماتتاردىڭ سەنىمىنە كىرگەن الاياق جالعان كەلىسىم-شارت جاساۋ ارقىلى تۇتىنۋشىلارىنا سان سوقتىردى.

- سوتتالۋشى الەۋەتتى ساتىپ الۋشىلاردى الەۋمەتتىك جەلىلەردە ءوزىنىڭ جالعان ارەكەتتەرىن بەلسەندى تۇردە جارنامالاي وتىرىپ، شەتەلدەن قۇرىلىس ماتەريالدارىن جەتكىزۋدە قالىپتاسقان بايلانىستار تۋرالى سەندىرگەن. مىسالى، جابىرلەنۋشىلەردىڭ بىرىنە 6 ميلليون تەڭگەدەن استام زالال كەلتىرىلگەن، بۇل قاراجاتتى قىلمىسكەر ءوز قالاۋى بويىنشا جۇمساعان، - دەلىنگەن حابارلامادا.

49 ادام - جالپى سوماسى 82 ميلليون تەڭگەدەن استام شىعىنعا باتتى.

سوتتا پروكۋرورلار سوتتالۋشىنىڭ ءوز مىندەتتەمەلەرىن ورىنداۋعا ناقتى مۇمكىندىگى بولماعانىن، جەتكىزۋ شارتتارىن ءوزىنىڭ قىلمىستىق نيەتىن ىسكە اسىرۋ ماقساتىندا جاساعانىن، جىمقىرىلعان اقشالاي قاراجاتتى جەكە ماقساتتا جۇمساعانىن دالەلدەدى.

سونىمەن قاتار، سوتتى بولعان ادام وسىعان ۇقساس الاياقتىق فاكتىلەرى ءۇشىن بۇرىن باس بوستاندىعىنان ايىرۋ ورىندارىندا جازاسىن وتەگەنى انىقتالدى.

دالەلدەمەلەردىڭ بۇلتارتپاس بولۋىنا بايلانىستى سوتتالۋشى ءوز كىناسىن تولىق مويىندادى.

قىلمىسكەر 4 جىل 8 ايعا باس بوستاندىعىنان ايىرۋ جازاسىنا سوتتالدى، جابىرلەنۋشىلەردىڭ ازاماتتىق تالاپتارى تولىعىمەن قاناعاتتاندىرىلدى. ۇكىم زاڭدى كۇشىنە ەندى.

ەلوردا پروكۋراتۋراسى ازاماتتاردى ساق بولۋعا جانە كۇماندى مامىلەلەرگە بارماۋعى شاقىرادى.

ەسكە سالا كەتەيىك، بۇعان دەيىن ۇلىتاۋ وبلىسىندا قارجىلىق پيراميدا ۇيىمداستىرعان ازامات سوتتالعانىن جازعان ەدىك.

اۆتور

باقىتگۇل اباي قىزى