استانادا 3 مىڭ رۋبيك كۋبيگىنەن ەلتاڭبا بەينەسى قۇراستىرىلدى
استانا. KAZINFORM - مەملەكەتتىك رامىزدەر كۇنىنە وراي Kazakhstan Speedcubing Federation كومانداسى ەرەكشە پاتريوتتىق اكسيا وتكىزدى.
ولار ەلورداداعى نۇرجول بۋلۆارىندا 3 مىڭنان استام رۋبيك تەكشەلەرىنەن ەلتاڭبا بەينەسىن جاسادى.
«جاستار رۋحى» جاستار قاناتىنىڭ ءتوراعاسى اقەركە ەسكەندىروۆانىڭ ايتۋىنشا، مۇنداي كرەاتيۆتى اك
سيالار وتانداستارىمىزدىڭ ەلگە سۇيىسپەنشىلىگىن وياتۋ، مەملەكەتتىك رامىزدەرگە قۇرمەتىن نىعايتۋ جانە بەلسەندى ازاماتتىق ۇستانىم قالىپتاستىرۋ ماقساتىندا وتكىزىلەدى.
- مەملەكەتتىك ەلتاڭبانىڭ ءمان-ماعىناسى تەرەڭدە جاتىر. وندا حالقىمىزدىڭ عاسىرلار بويعى تاريحى كورىنىس تاپقان. شاڭىراق - بەيبىتشىلىك پەن كەلىسىمدى، تۇلپار - قۋات-كۇش پەن ەركىندىكتى، ال بەس بۇرىشتى جۇلدىز - بولاشاققا كوزقاراسىمىزدى بەينەلەيدى. ءبىز قالىپتان تىس تاسىلدەر ارقىلى پاتريوتيزم قۇندىلىقتارىن ناسيحاتتاۋعا تىرىسامىز. جاستارىمىز مەملەكەتتىك رامىزدەرمەن رۋحاني بايلانىس بارىن سەزىنىپ، ولاردى ماقتان تۇتسا ەكەن دەيمىز. وسىنداي اكسيالار ازاماتتاردىڭ وتانعا سۇيىسپەنشىلىگىن، ەل ەرتەڭىنە دەگەن جاۋاپكەرشىلىك سەزىمىن وياتادى، - دەدى ول.
كولەمى 4×3 مەترلىك پاننونى قۇراستىرۋعا ءۇزىلىسسىز 10 ساعات جۇمسالعان. ناتيجەسىندە تاۋەلسىز قازاقستاننىڭ سيمۆولىنا اينالعان ەلتاڭبانىڭ دالمە-ءدال، پيكسەلدى بەينەسى ازىرلەندى.
سپيدكۋبينگ چەمپيونى جانە Kazakhstan Speedcubing Federation ۇيىمىنىڭ جەتەكشىسى ءاليحان ەرتۇرسىننىڭ ايتۋىنشا، مۇنداي جوبالار اسا جوعارى زەيىن مەن كوماندانىڭ ۇيلەسىمدى جۇمىس ىستەۋىن تالاپ ەتەدى.
- ەسكيز جاساۋ ءۇشىن ارنايى كومپيۋتەرلىك باعدارلاما كومەگىمەن ەلتاڭبانىڭ پيكسەلدى ۇلگىسىن ازىرلەپ، ونى بولىكتەرگە بولدىك. مۇنداي اۋقىمدى دۇنيەنى قۇراستىرۋ ۇلكەن جاۋاپكەرشىلىكتى قاجەت ەتەدى. الايدا بۇل ءبىزدىڭ العاشقى تاجىريبەمىز ەمەس. ەلوردا تۇرعىندارى مەن قوناقتارىنا ەرەكشە ءارى اسەرلى تۋىندى سىيلاي العانىمىزدى ماقتان تۇتامىز. جالپى، رۋبيك تەكشەسى - اقىل-ويدى، موتوريكانى، قيمىل-قوزعالىستى ۇيلەستىرۋگە جانە بارىنشا زەيىندى بولۋعا ارنالعان تاپتىرماس جاتتىعۋ قۇرالى، - دەدى ءا. ەرتۇرسىن.
سونىمەن بىرگە، بۇگىن قالا كوشەلەرى مەن قوعامدىق ورىندارىندا تۇرعىندارعا مەملەكەتتىك رامىزدەر تاقىرىبىنداعى ۆيكتورينالىق سۇراقتار قويىلىپ، بەلسەندى قاتىسۋشىلارعا ەستەلىك سىيلىقتار بەرىلەدى.
قالا تۇرعىندارى مەن قوناقتارىنا 3 مىڭ دانا شاعىن جالاۋشا تاراتىلادى، ال كوپقاباتتى تۇرعىن ۇيلەردىڭ تەرەزەلەرىنە 300 گە جۋىق تۋ ىلىنەدى.
ايتا كەتەيىك، مەملەكەت باسشىسى قاسىم-جومارت توقايەۆ ەلورداداعى «اتامەكەن» ەتنومەموريالدى كەشەنىندە وتكەن مەملەكەتتىك تۋ كوتەرۋ راسىمىنە قاتىستى.
مەملەكەتتىك رامىزدەرى كۇنى استانادا 500-گە جۋىق ءىس-شارا وتەدى.
اۆتور
ايجان سەرىكجان قىزى
