استانادا 1 ميلليوننان استام ءتۇپ جاسىل جەلەك ەگۋ جوسپارلانىپ وتىر - جەڭىس قاسىمبەك
استانا. KAZINFORM - مەملەكەت باسشىسىنا ەلوردانى كوگالداندىرۋ جانە اباتتاندىرۋ جوسپارى تانىستىرىلدى، دەپ حابارلايدى اقوردانىڭ باسپا ءسوز قىزمەتى.
جەڭىس قاسىمبەك بيىل استانا قالاسىندا 1 ميلليوننان استام ءتۇپ جاسىل جەلەك ەگۋ جوسپارلانعانىن ايتتى. سونىمەن قاتار 180 نەن اسا قوعامدىق كەڭىستىك پەن اۋلانى اباتتاندىرۋ كوزدەلىپ وتىرعانىن جەتكىزدى.
اتالعان جۇمىستار شاھاردىڭ تاريحي كوشەلەرىندە، پرەزيدەنت ساياباعىندا، ۇكىمەت ءۇيىنىڭ اينالاسىندا، ەسىل وزەنىنىڭ جاعالاۋىندا، «مىڭجىلدىق» اللەياسىندا، ترياتلون پاركىندە، Greenline بۋلۆارىندا، جەلىلىك ساياباقتا، ۆوكزال ماڭى مەن يلليۋزيا پاركىندە، سىعاناق، ش. قالداياقوۆ، گەتە، ءبىرجان سال جانە باسقا دا كوشەلەردىڭ بويىندا جۇرگىزىلەدى.
سونداي-اق اقبۇلاق وزەنىنىڭ ارناسىن تازالاۋ جالعاسادى. كەلەسى ايدا «قازاقستان» سپورت كەشەنىن جاڭعىرتۋ جۇمىستارى باستالادى.
استانادا اعاشتاردى قۇجاتتاندىرۋ جانە سيفرلاندىرۋ ارقىلى ەسەپكە الۋ شارالارى قولعا الىنادى. قالا تۇرعىندارى QR كودتىڭ كومەگىمەن اعاش تۋرالى اقپارات الىپ، وعان قاتىستى ماسەلە تۋىنداسا ءتيىستى ورگاندارعا حابارلاۋ مۇمكىندىگىنە يە بولادى.
وسىعان دەيىن مەملەكەت باسشىسىنىڭ «جاستار» ساياباعىندا اعاش ەككەنى تۋرالى جازدىق.
