استانا تۇتىننەن قاشان ارىلادى
استانا. KAZINFORM - جىل سايىن جىلىتۋ ماۋسىمىندا ەلوردانى ءتۇتىن باساتىنى بار، اسىرەسە وت جاعاتىن جەكە سەكتورلاردا. بۇل ماسەلە قاشان شەشىلەدى؟ ب ا ق وكىلدەرى وسى ساۋالدىڭ جاۋابىن ق ر پرەمەر-ءمينيسترىنىڭ ورىنباسارى سەرىك جۇمانعاريننەن سۇرادى.
«استاناداعى جەكە سەكتورلار مەن قالا ىرگەسىندەگى ەلدى مەكەندەردى گازداندىرۋ ءجۇرىپ جاتقانىن بۇعان دەيىن بىرنەشە رەت ايتتىق. سوندىقتان گاز تارتۋ جۇمىستاردىڭ اياقتالعانىن كۇتەيىك، سودان سوڭ جاعداي وزگەرەدى دەپ ويلايمىن»، - دەپ قىسقا قايىردى سەرىك جۇمانعارين ۇكىمەت ۇيىندە وتكەن باسپا ءسوز ءماسليحاتىندا.
سونداي-اق، ۆيتسە-پرەمەر ەلوردا مەن اقمولا وبلىسىندا گاز تارتۋ جۇمىستارى بەلسەندى ءجۇرىپ جاتقانىن ايتتى.
«اقمولا وبلىسىنا قاراستى الەكساندروۆكا اۋىلى اۋاسى لاس كەنتتەردىڭ ءبىرى. اۋىلدا وسى جازدان باستاپ گاز تارتۋ جۇمىستارى جۇرگىزىلىپ جاتىر»، - دەپ الداعى ۋاقىتتا ءبىر ناتيجەسى بولار دەپ ءۇمىت ارتتى.
ەسكە سالا كەتسەك، ەلورداداعى ءتۇتىن ماسەلەسى بۇرىننان قوزعالىپ كەلەدى. 2017-جىلى استانا قالاسىنىڭ اكىمى اسەت يسەكەشەۆ ءتۇتىن ماسەلەسىن شەشۋ جولدارىن ايتقان ەدى.
بىلتىر ەلوردانى قويۋ ءتۇتىن باسىپ، جاعىمسىز ءيىس جايلاعان ەدى. تۇرعىنداردىڭ شاعىمىنان سوڭ اۋا ساپاسىنىڭ نەگە بۇزىلعانىن قازگيدرومەت ماماندارى ءتۇسىندىردى.
