استانا سۋ ارناسىنىڭ باسشىسى قانشا جالاقى الادى

«استانا سۋ ارناسى» م ك ك باس ديرەكتورى تابيعات زەينۋلقابدەن سۋ تاريفىن كوتەرۋ تۋرالى جاريا تىڭداۋدا ءوزى مەن ۇجىمنىڭ قانشا جالاقى الاتىنىن ايتتى، دەپ حابارلايدى Kazinform.

ونىڭ ايتۋىنشا، «استانا سۋ ارناسى» باس ديرەكتورى رەتىندە ءوزى 725 مىڭ تەڭگە ايلىق الادى، ينجەنەرلىك-تەحنيكالىق قىزمەتكەر جالاقىسى 400 مىڭ تەڭگەدەن اسادى، تازالاۋشىلار ەڭبەكاقىسى - 180 مىڭ تەڭگە.

جالپى «استانا سۋ ارناسى» ۇجىمىنىڭ ورتاشا جالاقىسى - 308 مىڭ تەڭگە.

«ەكى تاۋلىكتەن جۇمىس ىستەيتىن ماشينيستەر شامامەن 200 مىڭ تەڭگە الادى. سلەسارلار - شامامەن 220-230 مىڭ تەڭگە، كەيدە جۇمىس كولەمى كوبەيسە، كوبىرەك جالاقى الادى. قازىرگى ۋاقىتتا مەنىڭ جالاقىم 725 مىڭ تەڭگەنى قۇرايدى»، - دەدى تابيعات زەينۋلقابدەن.

ەسكە سالا كەتسەك، 2024-جىلدىڭ 1- قاڭتارىنان باستاپ ەلورداداعى سۋ تاريفىن كوتەرۋ ۇسىنىلدى. استانادا جىل سايىن پاتەر سانى كوبەيىپ كەلەدى.

قازىرگى ۋاقىتتا 470 مىڭ ابونەنت بولسا، جاقىن ارالىقتا بۇل كورسەتكىش 500 مىڭعا جەتەدى.

جاريا تىڭداۋ قورىتىندىسى بويىنشا ايتىلعان ەسكەرتۋلەر مەن ۇسىنىستار ەسكەرىلىپ، وتىنىمدەر مۇقيات تالدانعان سوڭ قالالىق تابيعي مونوپوليالاردى رەتتەۋ دەپارتامەنتى تۇپكىلىكتى شەشىم قابىلدايدى.