استانا قىتايلىق تۋريستەر ءۇشىن جاڭا باعىتقا اينالماق
استانا. KAZINFORM - قىتاي حالىق رەسپۋبليكاسىنىڭ ءۇرىمجى قالاسىندا VII حالىقارالىق تۋريستىك كورمە - Xinjiang Spring Tourism Expo 2026 ءوتتى. بۇل تۋرالى استانا قالاسىنىڭ اكىمدىگى جازدى.
اۋقىمدى شاراعا «ءبىر بەلدەۋ - ءبىر جول» باستاماسىنا قاتىسۋشى ەلدەردەن، سونداي-اق الەمنىڭ وزگە دە ايماقتارىنان 600 دەن استام تۋريستىك ۇيىم جينالدى. كورمەگە «Astana Tourism» تۋريزمدى دامىتۋ ورتالىعى دا قاتىستى.
Xinjiang Spring Tourism Expo 2026 تۋريزم سالاسىنداعى حالىقارالىق بايلانىستى نىعايتۋدىڭ ماڭىزدى الاڭىنا اينالدى. كورمە تۋريستىك اگەنتتىكتەردى، قوناق ۇيلەردى جانە بەلسەندى دەمالىسقا ارنالعان تاۋار وندىرۋشىلەردى قوسا العاندا، سالا ماماندارىن جيناپ، قاتىسۋشىلارعا ءتيىمدى ۇسىنىستار مەن جەڭىلدىكتەر ۇسىندى.
- كورمە اياسىندا شينجاڭ-ۇيعىر اۆتونوميالىق اۋدانىنىڭ تۋروپەراتورلارى جانە وڭىرلىك تۋريزم باسقارماسىنىڭ وكىلدەرىمەن كەلىسسوزدەر جۇرگىزىلدى. كەزدەسۋلەر ناتيجەسىندە قىتايدان قازاقستانعا تۋريستىك توپتاردى ۇيىمداستىرۋ جونىندە كەلىسىمدەرگە قول جەتكىزىلدى، - دەلىنگەن حابارلامادا.
جالپى سانى 40 تان استام ىسكەرلىك بايلانىس ورناتىلىپ، الداعى ىنتىماقتاستىققا جاڭا مۇمكىندىكتەر اشىلدى.
«Astana Tourism» تانىستىرىلىمىندا وقيعالىق تۋريزمدى دامىتۋ مەن قازاقستان استاناسىنا باعىتتالعان تۋريستىك مارشرۋتتاردى ىلگەرىلەتۋگە ەرەكشە نازار اۋدارىلدى. كولىك قولجەتىمدىلىگى، اتاپ ايتقاندا تىكەلەي اۋە رەيستەرىنىڭ بولۋى جانە قالالار اراسىنداعى دامىعان لوگيستيكا قىتايلىق سەرىكتەستەردىڭ قىزىعۋشىلىعىن تۋدىرعان نەگىزگى فاكتورلاردىڭ ءبىرى بولدى.
سونىمەن قاتار، قولدانىستاعى 30 كۇندىك ۆيزاسىز رەجيم مەن «ءبىر بەلدەۋ - ءبىر جول» باستاماسىنىڭ تابىستى جۇزەگە اسىرىلۋى ق ح ر ازاماتتارىنىڭ استانا مەن قازاقستاننىڭ تۋريستىك الەۋەتىنە دەگەن قىزىعۋشىلىعىن ايتارلىقتاي ارتتىرىپ وتىر.
ەسكە سالا كەتەيىك، بۇعان دەيىن مەملەكەت باسشىسى تۋريزم سالاسىنداعى نەگىزگى ءۇش ايماقتى ايقىنداپ بەرگەن ەدى. قازىر مەملەكەتتىڭ بۇكىل ساياساتى وسى باعىتتاردىڭ توڭىرەگىندە قالىپتاسىپ وتىر. ءارقايسىسىنا ارناپ كەشەندى دامۋ جوسپارى ازىرلەنگەن. وندا الماتى تاۋ كلاستەرى، شۋچينسك- بۋراباي كۋرورتتىق ايماعى جانە ماڭعىستاۋ تۋريستىك ايماعى - قازاقستان تۋريزمىنىڭ ءۇش تىرەك نۇكتەسى رەتىندە اتالعان.
