استانا - ميلان تىكەلەي رەيسى اشىلادى

استانا. KAZINFORM - قازاقستاننىڭ كولىك ۆيتسە-ءمينيسترى تالعات لاستايەۆ استانادا وتكەن قازاقستان-يتاليا فورۋمىندا ەكى ەل اراسىنداعى ىنتىماقتاستىق جوبالارى تۋرلى ايتىپ بەردى، دەپ حابارلايدى Kazinform ءتىلشىسى.

ۆيتسە-مينيستر قازاقستاننىڭ گەوگرافيالىق ورنالاسۋى باستى ارتىقشىلىق بولىپ وتىرعانىن جەتكىزدى. ەۋروپا مەن ازيانىڭ ورتاسىندا ورنالاسقان ەل رەتىندە قازاقستان ينفراقۇرىلىمدى دامىتىپ، حالىقارالىق باستامالارعا، سونىڭ ىشىندە ەۋروپا وداعىنىڭ ورتا ءدالىزدى دامىتۋ جوباسىنا بەلسەندى قاتىسىپ كەلەدى.

- مەنىڭ ويىمشا، ءدال قازىر وسى ءدالىزدى تاڭدايتىن ۋاقىت كەلدى. اسىرەسە ءبىزدىڭ ەلىمىز ارقىلى ترانزيت قىتايدان ەۋروپاعا جۇك تاسىمالداۋ ءۇشىن بالاما باعىت بولا الادى، - دەدى تالعات لاستايەۆ.

وسى باستامانى دامىتۋ ءۇشىن تالعات لاستايەۆ اۋقىمدى ينۆەستيتسيالار سالۋ جوسپارلانىپ وتىرعانىن ايتتى.

- بۇل ءتۇرلى كولىك سەكتورلارىنا شامامەن 50 ميلليارد دوللار ينۆەستيتسيا سالۋ دەگەن ءسوز. ءبىز يتاليالىق كومپانيالاردى ولاردىڭ بىلىكتىلىگى، ساپاسى جانە جوعارى تەحنولوگيالارى ءۇشىن بەلسەندى تارتۋدامىز. ءبىز ينۆەستيتسيا تارتۋ ءۇشىن تارتىمدى جاعداي، سونىڭ ىشىندە «استانا» حالىقارالىق قارجى ورتالىعى شەڭبەرىندە قولايلى ينۆەستيتسيالىق كليمات جاساپ وتىرمىز. وعان قوسا، ارنايى ەكونوميكالىق ايماقتار قۇرىپ جاتىرمىز، - دەدى سپيكەر.

تالعات لاستايەۆ قازاقستان مەن يتاليا اراسىنداعى اۋە قاتىناسىنىڭ كەڭەيتىلىپ جاتقانىن ەرەكشە اتاپ ءوتتى. قازىر الماتى-ميلان تىكەلەي رەيسى ورىندالىپ ءجۇر، ال جاقىن ارادا استانا-ميلان جاڭا باعىتى اشىلادى.

- ءبىز ەلدەرىمىزدى جاقىنداتۋ، تۋريستىك بايلانىستى نىعايتۋ جانە ەكونوميكالىق ىنتىماقتاستىقتى دامىتۋ ءۇشىن بار كۇشىمىزدى سالامىز، - دەدى كولىك ۆيتسە-ءمينيسترى.

بۇعان دەيىن پرەمەر-مينيستر ولجاس بەكتەنوۆ قازاقستان مەن يتاليا اراسىنداعى ەكىجاقتى تاۋار اينالىمى 20 ميلليارد دوللارعا جۋىقتاعانىن ايتقان ەدى.

سونداي-اق، قازاقستان مەن يتاليا اراسىندا 180 ميلليون ەۋروعا مەموراندۋمدار بەكىتىلدى.