توقتاپ قالعان Astana LRT قۇرىلىسى قاشان جاندانادى - التاي كولگىنوۆ جاۋابى
بۇل تۋرالى بۇگىن قالا تۇرعىندارىمەن ەسەپ بەرۋ كەزدەسۋىندە ەلوردا اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
«LRT قالالىقتاردىڭ بارلىعىن تولعاندىرىپ وتىر. پاندەميا كەزەڭىندە ونىڭ قۇرىلىسىن جالعاستىرۋ ماسەلەسى توقتاپ قالعان ەدى. ويتكەنى، قازاقستاننىڭ ەكىنشى دەڭگەيلى بانكتەرىنەن عانا ەمەس، سونىمەن بىرگە حالىقارالىق بانكتەردەن دە سىرتقى زايم تارتۋ قاجەت بولدى. قازىرگى ۋاقىتتا بۇل جۇمىس قايتا جانداندى. بانكتەردەن قاراجات تارتۋ قاجەت»، - دەدى التاي كولگىنوۆ.
قالا باسشىسى وسى ۋاقىتقا دەيىن سالىنعان LRT نىساندارى قالا كوركىن بۇزىپ تۇرعاندىعىن دا جاسىرمادى.
«ونىڭ ۇستىنە وعان قوماقتى قاراجات جۇمسالىپ كەتتى. سوندىقتان بۇل جۇمىستى جالعاستىراتىن بولامىز. قازىرگى ۋاقىتتا بانكتەردەن ينۆەستيتسيا تارتۋ باعىتىنداعى جۇمىس جۇرگىزىلىپ جاتىر»، - دەدى ەلوردا اكىمى.
اۆتور: مارلان جيەمباي
