ەلوردادا اۆتوكولىك يەلەرى مەترو قۇرىلىسشىلارىنا شاعىمدانىپ جاتىر
استانا. KAZINFORM - استانادا LRT قۇرىلىسىن سىرلاۋ جۇمىستارى باستالدى.
الەۋمەتتىك جەلىدە LRT قۇرىلىسشىلارى اۆتوكولىگىنە بوياۋ شاشىراتقانى تۋرالى شاعىمدانعان ەلوردا تۇرعىنىنىڭ ۆيدەوسى تارادى. اۆتوردىڭ ايتۋىنشا، 16- مامىردا اۋەجايدىڭ قىزمەتتىك پاركينگىندە اۆتوكولىگىن قالدىرعان.
- كولىككە بوياۋ شاشىراعان، جۇرتتار LRT- نى بويادى دەپ جاتىر، سودان ماشيناعا شاشىراعان، - دەيدى ۆيدەودا ەر ادام.
سونداي-اق ۆيدەو اۆتورى وقيعا ورنىنا پوليتسيا شاقىرعانىن ايتتى.
ءىستىڭ ءمان-جايىن سۇراپ LRT قۇرىلىسىنا جاۋاپتى City Transportation Systems (CTS) كومپانياسىنىڭ باسپا ءسوز قىزمەتىنە جۇگىنگەن ەدىك. بىزگە بەرىلگەن مالىمەتكە سايكەس، بوياۋ جۇمىستارىنىڭ جۇرگىزىلەتىنى تۋرالى ەسكەرتۋ تاقتايشاسى ىلىنگەن، كەيىن قاتە جازىلعاندىقتان الىپ تاستاعان، ءبىراق، تاقتايشا ورنىنا قايتادان قويماعان.
- 1-مامىردان باستاپ استاناداعى جەڭىل رەلستى كولىك (LRT) جەلىسىندە ەستاكادا تىرەكتەرى مەن ارقالىقتارىن سىرلاۋ جۇمىستارى جۇرگىزىلىپ جاتىر. سىرلاۋ ءۇشىن زاماناۋي ءارى فۋنكسيونالدى اشىق سۇر RAL 7047 (Telegrey 4) ءتۇسى تاڭدالدى. بۇل رەڭك ەستەتيكالىق جاعىنان تارتىمدى جانە پراكتيكالىق قاسيەتكە يە، ول لاستانۋعا، شاڭ مەن اۋا رايى جاعدايىنا ءتوزىمدى. ارنايى لاك، ياعني بوياۋ قۇرامى قۇرىلىمداردى ۋلتراكۇلگىن ساۋلەلەنۋدەن، ىلعالدان، تەمپەراتۋرا اۋىتقۋلارىنان جانە مەحانيكالىق اسەرلەردەن سەنىمدى قورعايدى. سونىمەن قاتار، بۇل جابىن ەكولوگيالىق قاۋىپسىز جانە زاماناۋي ستاندارتتارعا تولىق سايكەس كەلەدى، - دەپ ءتۇسىندىردى كومپانيادان.
وسى ورايدا LRT قۇرىلىسىن سىرلاۋ جۇمىسى كەزەڭ- كەزەڭىمەن جۇرگىزىلەتىنى حابارلاندى.
ايتا كەتسەك، بۇگىندە ەلورداداعى LRT رەلسىنىڭ 25 پايىزى توسەلدى.
بيىل كۇزدە LRT تەستىلىك رەجيمدە ىسكە قوسىلادى.
ەسكە سالايىق، ەلوردا اكىمى جەڭىس قاسىمبەك LRT- دە جول ءجۇرۋ باعاسى قانشا بولاتىنىن ايتتى.
اۆتور
داۋلەت ىزتىلەۋ
