استانا حالقىنىڭ سانى 1,5 ميلليونعا جۋىقتادى

استانا. KAZINFORM - ۇلتتىق ستاتيستيكا بيۋروسى حالىق سانىنا قاتىستى جاڭالانعان دەموگرافيالىق ستاتيستيكالىق سيفر جاريالادى. بيۋرو مالىمەتىنشە، 2024 -جىلدىڭ 1-ماۋسىمىنداعى كورسەتكىش بويىنشا قازاقستانداعى حالىق سانى 20139914 ادامعا جەتكەن.

ۇلتتىق ستاتيستيكا بيۋروسى جاريالاعان مالىمەتكە سايكەس، 2024 -جىلدىڭ قاڭتار جانە ماۋسىم ايلارى ارالىعىندا حالىق سانىنىڭ ءوسىمى 106072 ادامدى قۇراعان. جىل باسىندا ەلىمىزدە 20033841 ادام ءومىر سۇرسە، 1-ماۋسىمداعى كورسەتكىش بويىنشا حالىق سانى 20139914 ادامعا جەتكەن.

قالا حالقىنىڭ سانى 12552583 ادام بولسا، اۋىل حالقىنىڭ سانى 7587331 قۇراپ وتىر. ال قازاقستاندا 10302166 ايەل تۇراتىن بولسا، ەرلەردىڭ سانى 9837748.

قازاقستان حالقىنىڭ ەڭ كوپ بولىگى الماتى قالاسىندا ءومىر سۇرەتىنى بەلگىلى بولىپ وتىر. وندا 2,2 ميلليون ادام تۇرادى.

ەكىنشى ورىندا تۇركىستان وبلىسى. اتالعان وڭىردە 2,1 ميلليون تۇرعىن بولسا، الماتى وبلىسىندا 1,5 ميلليون حالىق ءومىر سۇرەدى.

2024 -جىلدىڭ 1-ماۋسىمداعى كورسەتكىشكە ساي باس شاھار استانادا 1464415 ادام، ال شىمكەنت قالاسىندا 1236901 تۇرعىن ءومىر سۇرەتىنى بەلگىلى بولدى.