استانا دۇنيەجۇزىلىك تۋريستىك اليانسقا مۇشە بولدى
استانا. KAZINFORM - استانا قالاسى 30-قازان كۇنى Visit Astana تۋريستىك برەندى رەتىندە دۇنيەجۇزىلىك تۋريستىك اليانستىڭ (WTA) رەسمي مۇشەسى بولدى، - دەپ جازدى ەلوردا اكىمدىگى سايتى.
استانا دۇنيەجۇزىلىك تۋريستىك اليانستىڭ جاڭا مۇشەسى رەتىندە حالىقارالىق ءتۋريزمدى دامىتۋ جانە شەتەلدىك قوناقتاردى تارتۋ ءۇشىن جاڭا مۇمكىندىكتەر اشادى، قازاقستاننىڭ الەمدىك تۋريستىك ارەناداعى تارتىمدىلىعىن ارتتىرۋعا ىقپال ەتەدى.
«Xianghu Dialogue 2024» فورۋمى 1-قاراشاعا دەيىن جالعاسادى. ونىڭ بارىسىندا الەمنىڭ 45 ەلىنەن كەلگەن تۋريستىك يندۋستريا مەن حالىقارالىق ۇيىمداردىڭ جەتەكشى وكىلدەرى قازىرگى ەكونوميكالىق ۇردىستەر مەن ءتۋريزمنىڭ جاڭا باعىتتارىن تالقىلايدى. بيىلعى فورۋم قاتىسۋشىلاردى تۋريزم يندۋسترياسىنىڭ قازىرگى جاعدايى مەن دامۋ پەرسپەكتيۆالارىن تالقىلاۋعا شاقىراتىن «Geared Up for a New Venture - The Future is Now» تاقىرىبىمەن ءوتىپ جاتىر.
نەگىزگى تاقىرىپتارعا مىنالار جاتادى: تۋريزمدى تۇراقتى دامىتۋ، حالىقارالىق ىنتىماقتاستىقتى نىعايتۋ، ەلدەر اراسىنداعى تۋريستىك ءوزارا ءىس- قيمىلدى كەڭەيتۋ، سونىمەن قاتار تۋريستىك يندۋسترياداعى يننوۆاتسيالار مەن جاسىل تەحنولوگيالاردىڭ ءرولى.
دۇنيەجۇزىلىك تۋريستىك اليانس - قىتايدا قۇرىلعان حالىقارالىق ۇيىم، ول ۇلتتىق جانە ايماقتىق تۋريستىك بىرلەستىكتەردى، تۋريستىك كومپانيالاردى، دەستيناتسيالاردى، عىلىمي- زەرتتەۋ ينستيتۋتتارىن، باق جانە باسقا دا مەملەكەتتىك جانە جەكە تۋريستىك سۋبەكتىلەردى بىرىكتىرەدى.
قازىرگى ۋاقىتتا WTA- عا 44 ەلدەن 242 مۇشە، ونىڭ ىشىندە 45-تەن استام سالالىق قاۋىمداستىق، 80 ءىرى تۋريستىك كومپانيا جانە 14 وقۋ ورنى بار. WTA مۇشەلەرىنە CNN International ،Qatar Tourism ،Los Angeles Tourism - Convention Board Japan Airlines ،United Airlines ،Hyatt Hotels, Aeroflot ،Airbnb جانە باسقالارى سياقتى تانىمال ۇيىمدار كىرەدى.
بيىلعى سەگىز ايدا تۋريزم سالاسىندا نەگىزگى كاپيتالعا سالىنعان ينۆەستيتسيا كولەمى 527,6 ميلليارد تەڭگەگە جەتكەنىن جازعان بولاتىنبىز.
اۆتور
ەلميرا ورالبايەۆا
