استانا اگلومەراتسيادا 2 قالاشىق قۇرىلادى
استانا. KAZINFORM - استانا اگلومەراتسيادا 2 قالاشىق قۇرىلادى. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ايتتى.
«مينيسترلىك استانا قالاسىنىڭ جانە اقمولا وبلىسىنىڭ اكىمدىكتەرىمەن بىرلەسىپ، استانا اگلومەراتسياسىن دامىتۋدىڭ 2024-2028-جىلدارعا ارنالعان كەشەندى جوسپارىنىڭ جوباسىن ازىرلەدى. قازىرگى ۋاقىتتا استانا اگلومەراتسياسى اۋماعىنا استانا قالاسى جانە وبلىس حالقىنىڭ 40 پايىزدان استامى تۇراتىن اقمولا وبلىسىنىڭ قوسشى قالاسىن قوسا العاندا ارشالى، سەلينوگراد، شورتاندى اۋداندارىنىڭ 46 ەلدى مەكەنى كىرەدى. سوڭعى 10 جىلدا استانا قالاسىنىڭ حالقى 46 پايىزعا ءوستى. ال بولجامدى دەرەكتەر بويىنشا 2035-جىلعا قاراي 2,3 ميلليون ادامدى قۇرايدى. اگلومەراتسيا ەلدى مەكەندەرىنەن استاناعا كۇندەلىكتى ماياتنيكتىك كوشى-قون 200 مىڭنان استام ادامدى جانە 30 مىڭ اۆتوكولىكتى قۇرايدى»، - دەدى مينيستر.
ونىڭ اتاپ وتۋىنشە، وسىعان بايلانىستى ەلوردا ينفراقۇرىلىمىنىڭ بارلىق تۇرلەرىنە جۇكتەمەنىڭ ۇلعايۋىنا، قالانىڭ شەت ايماقتارىنىڭ كەڭەيۋىنە، ىڭعايلى كولىك جۇيەسىنىڭ بولماۋىنا جانە الەۋمەتتىك نىساندار تاپشىلىعىنا الىپ كەلەتىن ءبىرقاتار پروبلەما بار.
«جوعارىدا ايتىلعان ماسەلەلەردى شەشۋ ءۇشىن ازىرلەنگەن كەشەندى جوسپاردا جۇيەلى شارالار كوزدەلگەن. جالپى، قالا قۇرىلىسىن دامىتۋعا، الەۋمەتتىك جانە ينجەنەرلىك- كولىك ينفراقۇرىلىمىن جاڭارتۋعا، سونداي- اق ەكولوگيالىق تۇراقتىلىقتى، قوعامدىق قاۋىپسىزدىكتى جانە توتەنشە جاعدايلاردىڭ الدىن الۋدى قامتاماسىز ەتۋگە باعىتتالعان جالپى سوماسى 1,13 تريلليون تەڭگەگە 329 ءىس-شارانى ىسكە اسىرۋ كوزدەلگەن. اگلومەراتسيانى اۋماقتىق دامىتۋ ماقساتىندا ەلوردا مەن اقمولا وبلىسىنىڭ دامۋ جوسپارلارىن ۇندەستىرۋگە مۇمكىندىك بەرەتىن ءبىرىڭعاي قالا قۇرىلىسى ساياساتىن ازىرلەۋ جوسپارلانعان. سونىمەن قاتار وسى باعىتتا اگلومەراتسيا قۇرامىنداعى ەلدى مەكەندەردىڭ اكىمشىلىك شەكارالارىن بەلگىلەۋ جوسپارلانۋدا. بۇل ءوز كەزەگىندە قالا ماڭى ايماعىنداعى جەر قاتىناستارىن دامىتۋعا وڭ اسەر ەتەدى. جالپى اۋدانى 940 گەكتاردان اساتىن 2 قالاشىق قۇرۋ كوزدەلىپ وتىر. ولاردىڭ اۋماعىندا شاعىن بيزنەس جۇرگىزۋگە ارنالعان ءۇي-جايلارى بار تۇرعىن ۇيلەر سالىناتىن بولادى»، - دەدى نۇرلان بايبازاروۆ.
