استانا اكىمى ورتتەن قىز بالانى قۇتقارعان تۇرعىنعا 2 ميلليون تەڭگە بەردى
بۇل تۋرالى ەلوردا اكىمى ءوزىنىڭ الەۋمەتتىك جەلىدەگى پاراقشاسىنا جازدى. استانا قالاسىنىڭ اكىمى جەڭىس قاسىمبەك 12-تامىز كۇنى ورتەنىپ جاتقان ءۇيدىڭ بالكونىنان كىرىپ، قىز بالانى قۇتقارىپ قالعان التىنبەك التايەۆتى جانە ونىڭ ۇلىن قابىلدادى.
بۇل تۋرالى ەلوردا اكىمى ءوزىنىڭ الەۋمەتتىك جەلىدەگى پاراقشاسىنا جازدى. سۋرەتتەن كورىپ وتىرعانىمىزداي، جەڭىس قاسىمبەك التايەۆقا 2 ميلليون تەڭگەنىڭ سەرتيفيكاتىن تابىستاعان.
«التىنبەك التايەۆپەن جانە ونىڭ ۇلىمەن كەزدەستىم. ەر ادام تۇرعىن ءۇي كەشەنىنىڭ جوعارى قاباتىندا بولعان ورتتەن قىز بالانى قۇتقارىپ قالدى. التىنبەكتىڭ ايتۋىنشا، قىزىل جالىنعا ورانعان پاتەردى كورگەننەن كەيىن بالكوننان ورتەنىپ جاتقان تەرەزەگە ەش ويلانباستان سەكىرىپ كىرگەن. ونىڭ وسىنداي جاۋاپتى ساتتە ۇرەيگە بوي الدىرماي، قاۋىپكە بەل بۋعانى تاڭعالدىرادى ءارى بۇل ارەكەتى قۇرمەتكە لايىق»، - دەپ جازعان جەڭىس قاسىمبەك.
التىنبەك التايەۆتىڭ ءوزى بولسا وقيعانى باستان-اياق بايانداپ بەرگەن. ونىڭ ايتۋىنشا، ءورت 12-تامىز كۇنى تاڭعى ساعات 09:00 شاماسىندا بولعان. ايقاي-شۋدى ەستىگەن التايەۆ جان-جاعىنا قاراپ، ءورتتى بايقاعان. قۇتقارۋشىلار ەسىكتى ەندى بۇزعالى جاتقانىن كورگەن ول اشىق تۇرعان بالكوننان سەكىرىپ كىرىپ، پاتەردەگى توكتاردى اجىراتقان.
«قاراسام، ءورت شاينەكتەن شىعىپتى. بۇكىل توكتاردى اجىراتىپ، پاتەردىڭ ىشىندە جىلاپ جاتقان قىزدى ىزدەدىم. تاۋىپ العان سوڭ، قورىقپا دەپ ونى الىپ شىقتىم. بۇل مەنىڭ عانا ەمەس، ءورت سوندىرۋشىلەر مەن تۇرعىنداردىڭ ەرلىگى»، - دەيدى ول.
