استانا اكىمدىگى ءماسىموۆتىڭ ۇيىنەن باس تارتتى
استانا اكىمدىگى كارىم ءماسىموۆتىڭ ءۇيىن كوممۋنالدىق مەنشىككە قابىلدامايدى، - دەپ حابارلايدى Massaget.kz ءتىلشىسى.
بۇل تۋرالى رەداكتسياسىنىڭ ساۋالىنا جاۋاپتا ايتىلعان.
«استانا قالاسى اكتيۆتەر جانە مەملەكەتتىك ساتىپ الۋ باسقارماسى» م م قازىرگى ۋاقىتتا اتالعان عيماراتتى كوممۋنالدىق مەنشىككە قابىلداۋ جوسپارلانباعانىن مالىمدەيدى»، - دەلىنگەن ۆەدومستۆو جاۋابىندا.
ايتا كەتەيىك، بۇعان دەيىن قايتارىلعان اكتيۆتەردى باسقارۋ كومپانياسى بۇرىنعى پرەمەر-مينيستر كارىم ءماسىموۆتىڭ استاناداعى ءۇيى ەلوردا اكىمدىگىنىڭ سۇراۋىنان كەيىن الەۋمەتتىك ماقساتقا بەرىلەدى دەپ مالىمدەگەن بولاتىن.
كارىم ءماسىموۆتىڭ ءۇيى قاراوتكەل شاعىناۋدانىندا، ەرەيمەنتاۋ كوشەسى، 1-مەكەنجايىندا ورنالاسقان. بۇعان دەيىن بۇل نىسان 879 مۇلىكپەن بىرگە اۋكسيونعا قويىلعان. ولاردىڭ ىشىندە جيھاز، تۇرمىستىق زاتتار، اشەكەيلەر، كوللەكتسيالىق مونەتالار مەن كادەسىي قارۋ-جاراقتار بار.
