استانا اۋەجايىندا ۇشاقتاردىڭ تۇندە ۇشىپ-قونۋىنا شەكتەۋ قويىلادى

استانا. KAZINFORM - بيىل 1-مامىردان باستاپ ەلوردا اۋەجايىنىڭ ۇشۋ-قونۋ جولاعىنا كۇردەلى جوندەۋ جۇرگىزۋگە بايلانىستى شەكتەۋلەر ەنگىزىلەدى. بۇل تۋرالى اۋەجايدىڭ قىزمەتى حابارلادى.

استانا قالاسىنىڭ اۋەجايىن تولىق جاڭعىرتۋعا بايلانىستى دايىندىق جالعاسۋدا. ونىڭ شەڭبەرىندە كولىك مينيسترلىگى ەلوردا اۋەجايى باسشىلىعىمەن بىرلەسىپ، وتاندىق جانە شەتەلدىك اۋە كومپانيالاردىڭ وكىلدەرىمەن كەڭەس وتكىزدى.

«ءبىرقاتار كەلىسسوزدەردىڭ، اۋا رايى بولجامىنىڭ، اۋەجايدىڭ ءارتۇرلى ۋاقىت ارالىعىنداعى جۇكتەمەسىن زەردەلەي كەلە، جولاۋشىلار ءۇشىن تۋىندايتىن قولايسىزدىق سالدارىن ازايتۋ ماقساتىندا تۇنگى ۋاقىتتا كۇردەلى جوندەۋ جۇرگىزۋ تۋرالى شەشىم قابىلداندى. وسىلايشا، 2024 -جىلعى 1-مامىردان 24-جەلتوقسانعا دەيىن جەرگىلىكتى ۋاقىت بويىنشا ساعات 22:00-دەن 06:00-گە دەيىن استانا قالاسىنىڭ اۋەايلاعىندا اۋە كەمەلەرىنىڭ ۇشىپ-قونۋىنا شەكتەۋ قويىلادى. بۇل شارا اۋەجاي ۇسىناتىن قىزمەتتەردىڭ ساپاسىنا كەرى اسەر ەتپەيدى»، - دەپ جازىلعان رەسمي حابارلامادا.

ءوز كەزەگىندە ۇشۋ-قونۋ جولاعىن كۇردەلى جوندەۋ جۇمىستارى بارلىق قاجەتتى قۇرىلىس نورمالارى مەن قاۋىپسىزدىك نورمالارىن ساقتاپ، كولىك مينيسترلىگىنىڭ ازاماتتىق اۆياتسيا كوميتەتى مەن قازاقستاننىڭ اۆياتسيالىق اكىمشىلىگىنىڭ تۇراقتى باقىلاۋىمەن جۇرگىزىلمەك.

اۋەجايدىڭ قازىرگى ۇشۋ-قونۋ جولاعى 20 جىلدان استام ۋاقىت بۇرىن پايدالانۋعا بەرىلگەن جانە سەنىمگەرلىك باسقارۋ كەزەڭىندە ينۆەستورعا ارتىلعان باستى مىندەت - ۇشۋ-قونۋ جولاعىن كۇردەلى جوندەۋ بولعان.

«وسى ءىرى جوبانى ىسكە اسىرۋ ينۆەستوردىڭ جەكە قاراجاتى ەسەبىنەن جۇزەگە اسىرىلادى. ءبىرىنشى كەزەكتە اۋە كەمەلەرىنىڭ بارلىق تۇرلەرىن شەكتەۋسىز قابىلداۋ ءۇشىن ۇشۋ قاۋىپسىزدىگىن قامتاماسىز ەتۋگە جانە اۋەايلاق جابىندارىنىڭ ساپالىق سيپاتتامالارىن جاقسارتۋعا باعىتتالعان. وسى ورايدا رەيستەر كەستەسىنە وزگەرىستەر ەنۋى مۇمكىن. سوندىقتان جولاۋشىلارعا اۋە كومپانيالارى مەن اۋەجايدىڭ انىقتامالىق قىزمەتتەرىنەن رەيس ستاتۋسىن ناقتىلاۋ ۇسىنىلادى»، - دەيدى اۋەجايدىڭ باسپا ءسوز قىزمەتى.

بۇعان دەيىن اراب كومپانياسى استانا اۋەجايىنىڭ جۇمىسىن قولعا العانى حابارلانعان ەدى.

اۆتور

ايجان سەرىكجان قىزى