استانا اۋەجايى رەيستەر كەستەسىن ۋاقىتشا وزگەرتەدى
استانا. KAZINFORM - استانا اۋەجايىندا ۇشۋ-قونۋ جولاعىندا جوسپارلى جوندەۋ جۇمىستارى جۇرگىزىلۋىنە بايلانىستى رەيستەر كەستەسىنە ۋاقىتشا وزگەرىستەر ەنگىزىلەدى. بۇل تۋرالى اۋەجايدىڭ باسپا ءسوز قىزمەتى مالىمدەدى.
2026-جىلعى 15-ءساۋىر مەن 31-مامىر ارالىعىندا اۋەجايدا كۇن سايىن ساعات 10:00 دەن 18:00 گە دەيىن جوندەۋ جۇمىستارى جۇرگىزىلەدى.
وسىعان بايلانىستى اتالعان ۋاقىتقا جوسپارلانعان بارلىق رەيستەر الدىن الا ەرتەرەك نەمەسە كەشىرەك ۋاقىتتارعا اۋىستىرىلدى.
- جولاۋشىلاردان ساپارلارىن جوسپارلاۋ كەزىندە وسى اقپاراتتى ەسكەرۋدى سۇرايمىز. ۇشۋ ۋاقىتىنىڭ وزەكتى كەستەسىن اۋەجايدىڭ رەسمي سايتىنان نەمەسە اۋە كومپانياسىنان الدىن الا ناقتىلاۋدى ۇسىنامىز. اۋەجاي تەرمينالى مەن جولاۋشىلارعا قىزمەت كورسەتۋ ايماقتارى شتاتتىق رەجيمدە، ەشقانداي شەكتەۋسىز جۇمىس ىستەيدى، - دەلىنگەن اۋەجايدىڭ باسپا ءسوز قىزمەتى حابارلاماسىندا.
جولاۋشىلار اعىنىنىڭ جينالۋىن بولدىرماۋ ءۇشىن جولاۋشىلارعا اۋەجايعا الدىن الا كەلۋ ۇسىنىلادى:
- ىشكى رەيستەر ءۇشىن كەمىندە 2 ساعات بۇرىن؛
- حالىقارالىق رەيستەر ءۇشىن كەمىندە 3 ساعات بۇرىن.
جۇرگىزىلىپ جاتقان جۇمىستار ۇشۋ قاۋىپسىزدىگىن قامتاماسىز ەتۋگە جانە اۋەجاي ينفراقۇرىلىمىنىڭ ساپاسىن ارتتىرۋعا باعىتتالعان.
