اسكەري قىزمەتشىلەرگە بۇرىن توقتاتىلعان ءبىرقاتار جەڭىلدىك قايتارىلۋى مۇمكىن

استانا. قازاقپارات - 2025 -جىلدىڭ 1-قاڭتارىنان مەملەكەتتىك كۇشتىك قۇرىلىمدار قىزمەتكەرلەرىنىڭ ەڭبەك اقىسىن تولەۋ جاڭا جۇيەمەن جۇرگىزىلەدى. بۇل تۋرالى ءماجىلىس دەپۋتاتتارىنىڭ ساۋالىنا قورعانىس ءمينيسترىنىڭ ورىنباسارى گەنەرال-مايور باقىتبەك سىدىقوۆتىڭ جاۋابىندا ايتىلعان.

«بۇگىنگى كۇنى ۇكىمەت مەملەكەتتىك كۇشتىك قۇرىلىمدار قىزمەتكەرلەرىنىڭ ەڭبەك اقىسىن تولەۋدىڭ جاڭا جۇيەسىنە كوشۋىن قولدادى. ونى 2025 -جىلعى 1-قاڭتاردان باستاپ 2 كەزەڭمەن (2025-2026 -جىلدارى) جۇزەگە اسىرۋ جوسپارلانعان. وعان تولىق كولەمدە ءوتۋ بارىسىندا قارۋلى كۇشتەردىڭ اسكەري قىزمەتشىلەرىنىڭ لاۋازىمدىق جالاقىلارى ورتاشا 50 پايىزعا وسەدى»، - دەدى گەنەرال- مايور.

سونداي-اق، باقىتبەك سىدىقوۆ اسكەري قىزمەتشىلەرگە بۇرىن توقتاتىلعان جەڭىلدىكتەردى قايتارۋ بويىنشا جۇمىس جۇرگىزىلىپ جاتقانىن اتاپ وتەدى.

ولار مىنالار:

- اسكەري قىزمەتشىلەرگە كوممۋنالدىق قىزمەت ءۇشىن تولەنەتىن ۇستەماقىنى وتباسىنىڭ ءاربىر مۇشەسىنە تولەي وتىرىپ، ونىڭ كولەمىن وزگەرتۋ؛

- اسكەري قىزمەتشىلەر مەن ونىڭ وتباسى مۇشەلەرىنىڭ جىلىنا ءبىر رەت دەمالىس ورنىنا بارۋ جانە قايتۋى ءۇشىن جول ءجۇرۋ اقىسىنىڭ تەگىن بولۋىن قايتارۋ؛

- اسكەري قىزمەتشىلەردىڭ قوعامدىق كولىكتەردە تەگىن ءجۇرۋىن قايتارۋ؛

- اسكەري قىزمەتشىلەردىڭ جاۋىنگەرلىك، جۇمىلدىرۋ جانە جەدەل دايىندىق باعدارلامالارى بويىنشا 1 تاۋلىكتەن ارتىق دالالىق جاعدايلاردا بولۋى بارىسىندا، سونداي-اق ارنايى دالالىق جۇمىستاردى ورىنداۋ بارىسىندا تاۋلىكتىك نورمانىڭ 60 پايىز ەسەبىنەن دالالىق اقشالاي ۇلەستى قايتارۋ.

اۆتور
مارلان جيەمباي