اسكەري پارادقا قاتىسقان جاۋىنگەرلەر ماسكەۋدەن ورالدى
استانا. KAZINFORM - كەڭەس وداعىنىڭ باتىرى گەنەرال-مايور يۆان پانفيلوۆ اتىنداعى دەسانتتىق-شابۋىلداۋ اسكەرلەرىنىڭ 37-بريگاداسىنىڭ 80 اسكەري قىزمەتشىسى قازاقستان رەسپۋبليكاسى قارۋلى كۇشتەرىنىڭ اۋە قورعانىسى كۇشتەرىنە تيەسىلى ۇشاعىمەن تالدىقورعان قالاسىنا ورالدى. بۇل تۋرالى قورعانىس مينيسترلىگى ءمالىم ەتتى.
توعىزىنشى مامىر كۇنى قازاقستاندىق دەسانتشىلار قىزىل الاڭمەن سالتاناتتى شەرۋمەن ءوتىپ، بۇكىل ادامزاتتىڭ بەيبىتشىلىگى مەن ازاتتىعى جولىندا كۇرەسىپ، قازا تاپقان جاۋىنگەرلەر مەن كوزى ءتىرى ارداگەرلەرگە تاعزىم ەتتى.
- ماسكەۋدەگى سالتاناتتى شەرۋگە قاتىسۋ - مەن ءۇشىن زور مارتەبە. بۇرىنعى جىلدارى قىزىل الاڭنان ساربازدار مايدانعا اتتانعان. ەڭ اۋىر سوعىستا ولار رۋحىنىڭ كۇشى مەن وتانسۇيگىشتىگىنىڭ ارقاسىندا جەڭىسكە جەتتى. جەڭىس ءۇشىن ءومىرىن قيعان جانداردىڭ رۋحىنا تاعزىم ەتۋ مۇمكىندىگى بۇيىرعانىنا ماقتانامىن، - دەپ پارادقا قاتىسقان اعا لەيتەنانت ەرزات قوسىن ءوز اسەرىمەن ءبولىستى.
ەسكە سالا كەتەيىك، كەشە مەملەكەت باسشىسى قىزىل الاڭداعى پارادقا قاتىسقان قازاقستان قارۋلى كۇشتەرىنىڭ ساربازدارىنا قۇرمەت كورسەتكەن بولاتىن.
