اسكەري پاراد: كەزەك ءى ءى م-نىڭ ەليتالىق جەدەل جاساعىنا جەتتى

استانا. KAZINFORM - ىشكى ىستەر مينيسترلىگىنىڭ جەدەل دەن قويۋعا ارنالعان جاساعى جەڭىستىڭ 80 جىلدىعىنا ارنالعان اسكەري پارادتىڭ ايبىنىن اسىرۋعا شىقتى.

بىلايعى جۇرت بۇلاردى ورىسشادان قىسقارتىپ «سوبر» دەپ اتايدى. ءى ءى م-نىڭ ارنايى ماقساتتاعى بولىمشەلەرىن وتقا سالسا جانبايتىن، سۋعا سالسا باتپايتىن ەليتالىق جاساق دەسە جاراسادى. اسا كۇردەلى تاپسىرمالاردى ورىنداۋعا ماشىقتانعان بۇل اسكەريلەر ەكسترەميستىك، تەرروريستىك كورىنىستەرگە قارسى ارەكەت ەتىپ، توسقاۋىل قويۋعا مىندەتتەلگەن. مادەني-بۇقارالىق جانە اۋقىمدى ارنايى ءىس-شارالاردا بۇلار دا ءتارتىپتى قاداعالايدى. بۇل توپتى ءى ءى م ارنايى جانە جۇمىلدىرۋ دايىندىعى دەپارتامەنتىنىڭ باستىعى، پوليتسيا گەنەرال-مايورى سابىر جۇسىپبەكوۆ باستاپ ءوتتى.

ايتا كەتۋ كەرەك، بۇگىنگى اسكەري شەرۋگە 4 مىڭنان استام اسكەري قىزمەتشى، 200-دەن استام اسكەري تەحنيكا، 66 ۇشۋ اپپاراتى تارتىلعان.

سونداي-اق، پارادتا بيىل ساتىپ العان سۋ جاڭا Airbus ا-400 اسكەري- كولىك ۇشاعى العاش رەت قاتىسىپ وتىر. ارميالىق مي-17، مي-171 ش، مي-35 جانە كولىكتىك س-295، تۋ-154 م، ل-410 ۇشاقتارى، سۋ-30 س م، سۋ-25 جويعىش ۇشاقتارى، ل-39 وقۋ- جاۋىنگەرلىك ۇشاعىنىڭ ەكيپاجدارى شەرۋدىڭ ايبىنىنا اۋەدەن ايبىن قوستى.