اسكەردەن باس تارتىپ جاتقاندار جوق - قورعانىس مينيسترلىگىنىڭ وكىلى

استانا. KAZINFORM - بيىل اسكەري بولىمشەلەردىڭ قاجەتتىلىگىنە سايكەس جانە جاۋىنگەرلىك دايىندىقتى قولداۋ ماقساتىندا مەرزىمدى اسكەرگە شاقىرىلعانداردىڭ سانى ارتقان.

بۇل تۋرالى ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى فارحات ايداربەكوۆ ءمالىم ەتتى.

«اسكەري بولىمشەلەردىڭ قاجەتتىلىگىنە سايكەس جانە جاۋىنگەرلىك دايىندىقتى قولداۋ ماقساتىندا ءبىز مەرزىمدى اسكەرگە شاقىرىلاتىندار سانىن ارتتىردىق. اسكەرگە شاقىرىلىپ جاتقان جوسپىرىمدەردىڭ نەگىزگى كونتينگەنتى 18 جاستان 23 جاسقا دەيىن»، - دەدى فارحات ايداربەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سونداي-اق، جۋرناليستەر قورعانىس مينيسترلىگى وكىلىنەن كەيىنگى ۋاقىتتا اسكەري قىزمەتشىلەر مەن ساربازدار اراسىندا ءولىم جانە سۋيتسيد فاكتىلەرىنىڭ كوبەيىپ كەتۋ فاكتورى وتان الدىنداعى مىندەتىن وتەۋگە نيەتتىلەرگە اسەرى تۋرالى سۇرادى.

«ب ا ق-تاعى جاعىمسىز اقپاراتتار اسكەرگە شاقىرۋ ساپاسىنا اسەر ەتكەن جوق. اسكەرگە شاقىرۋ جاسىنداعى ازاماتتار ءوز بەتىنشە كەلىپ جاتىر. اسكەردەن جاپپاي باس تارتۋ نەمەسە تەرىس پىكىر جوق. ءيا، اسكەردەن جالتارۋشىلار بار، ءبىراق ولارمەن ىشكى ىستەر ورگاندارى جۇمىس ىستەپ جاتىر، سول سياقتى جەرگىلىكتى اتقارۋشى ورگاندار دا قامتاماسىز ەتەدى»، - دەيدى ول.

ونىڭ ايتۋىنشا، اسكەردەن سوتتالعان، وتباسىلىق جاعدايلارعا بايلانىستى، وقۋ، دەنساۋلىق جاعدايى تاعى باسقا سەبەپتەرمەن بوساتىلادى.

بۇعان دەيىن قورعانىس مينيسترلىگى وكىلى كامەلەت جاسىنا تولعان جاستاردى اسكەرگە كوشەدەن ەرىكسىز الىپ كەتۋ زاڭدى ما، دەگەن ساۋالعا جاۋاپ بەردى.

اۆتور

داۋلەت ىزتىلەۋ