اسكەردە تاماقتانۋ جۇيەسى سيفرلاندىرىلىپ، ءمازىر كەڭەيتىلدى

استانا. KAZINFORM - قازاقستان قارۋلى كۇشتەرىندە اسكەري قىزمەتشىلەردى تاماقتاندىرۋ جۇيەسىن جاڭعىرتۋعا باعىتتالعان جاڭا ستاندارتتار ەنگىزىلىپ جاتىر.

قورعانىس مينيسترلىگىنىڭ مالىمەتىنشە، جاڭارتۋدىڭ نەگىزگى ەلەمەنتتەرىنىڭ ءبىرى - اسكەري قىزمەتشىلەرگە بىرنەشە تاعامنىڭ ىشىنەن تاڭداۋ جاساۋعا مۇمكىندىك بەرەتىن «شۆەد ۇستەلى» قاعيداتتارىن ەنگىزۋ.

جاڭا مودەل بويىنشا ساربازدار كۇن سايىن بىرنەشە ءتۇرلى ءبىرىنشى جانە ەكىنشى تاعامنان ءوز قالاۋى بويىنشا تاڭداي الادى. بۇل رەتتە ازىق-تۇلىك پايىنىڭ قۇنى وزگەرمەيدى. جۇيە تاعام دايىنداۋ مەن تاراتۋ پروتسەستەرىن وڭتايلاندىرۋ ەسەبىنەن ىسكە اسىرىلادى.

قازىرگى ۋاقىتتا اسكەردى تاماقتاندىرۋدى 40 مىڭنان استام اسكەري قىزمەتشىنى قامتيتىن 23 قىزمەت كورسەتۋشى قامتاماسىز ەتەدى. ونىڭ ىشىندە مەرزىمدى قىزمەت ساربازدارى، كۋرسانتتار مەن كادەتتەر بار. سونىمەن قاتار كونكۋرس ناتيجەسىندە 11 جاڭا جەتكىزۋشى انىقتالعان.

تاماقتاندىرۋ جۇيەسى ۇزاق مەرزىمدى فورماتقا كوشىرىلمەك. كەلىسىمشارتتار ءۇش جىلعا جاسالىپ، كونكۋرس راسىمدەرى تولىقتاي ەلەكتروندىق فورماتقا اۋىستىرىلادى. بۇل اشىقتىقتى ارتتىرىپ، سىبايلاس جەمقورلىق تاۋەكەلدەرىن ازايتۋعا مۇمكىندىك بەرەدى.

تاماق ساپاسىن جاقسارتۋ ءۇشىن 300-گە جۋىق باقىلاۋ جانە كورسەتىلىمدىك تاعام ازىرلەۋ ءراسىمى ۇيىمداستىرىلىپ، اسپازدارعا ارنالعان وقىتۋ شارالارى وتكىزىلگەن.

- ءبىز تاماقتانۋدى ۇيىمداستىرۋدىڭ زاماناۋي مودەلىنە كوشۋدەمىز. نەگىزگى نازار اسكەري قىزمەتشىنىڭ قاجەتتىلىگىنە اۋدارىلادى. «شۆەد ۇستەلى» ەلەمەنتتەرى تاعامنىڭ ارتۇرلىلىگىن ارتتىرىپ، ساربازدارعا تاڭداۋ مۇمكىندىگىن بەرەدى، - دەدى قورعانىس ءمينيسترىنىڭ ورىنباسارى، گەنەرال-مايور الماز جۇماكەيەۆ.

سونداي-اق اسكەري قىزمەتشىلەردىڭ پىكىرلەرى ەسكەرىلىپ، بولىمشەلەردە انونيمدى ساۋالنامالار جۇرگىزىلگەن. ناتيجەسىندە ءمازىر قولدانىستاعى نورمالاردى ساقتاي وتىرىپ جاڭارتىلعان.

جاڭاشىلدىق اياسىندا ۇلتتىق تاعامدارعا دا باسىمدىق بەرىلىپ وتىر. اسكەري بولىمدەردە «ۇلتتىق تاعامدار كۇنى» ەنگىزىلىپ، مازىرگە مامپار، قۋىرداق، پالاۋ، ەت جانە باۋىرساق سياقتى ءداستۇرلى اس تۇرلەرى قوسىلعان.

بۇدان بولەك، دالالىق جاعدايدا تاماق ساپاسىن ارتتىرۋ جانە اسكەري اسپازدار ينستيتۋتىن دامىتۋ جۇمىستارى قولعا الىنعان. اسپازدار پوليگونداردا ازاماتتىق جەتكىزۋشىلەرمەن بىرلەسىپ جۇمىس ىستەيدى.

قوعامدىق باقىلاۋ دا كۇشەيتىلگەن. «انالار جۇرەگى» سارباز انالارى كوميتەتى تاماق ساپاسىن باعالاۋ جانە جەكە قۇراممەن ءوزارا ءىس- قيمىل جاساۋ پروتسەسىنە قاتىسادى.

ۆەدومستۆو وكىلدەرىنىڭ ايتۋىنشا، قابىلدانعان شارالار اسكەري قىزمەتشىلەردى ازىق- تۇلىكپەن قامتاماسىز ەتۋ جۇيەسىن ساپالى جاڭا دەڭگەيگە كوتەرۋگە باعىتتالعان.

ايتا كەتەيىك، بۇعان دەيىن اسكەرگە شاقىرىلۋشىلاردى ىرىكتەۋ قالاي جۇرگىزىلىپ جاتقانى حابارلاندى.