اسكەردە ءولىم-ءجىتىم جيىلەدى: قورعانىس مينيسترلىگى تۇسىنىك بەردى

استانا. KAZINFORM - قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى، گەنەرال-مايور شايح-حاسان جازىقبايەۆ قازاقستان ارمياسىندا ءولىم-ءجىتىم نەگە جيىلەگەنىن ءتۇسىندىردى.

ونىڭ پىكىرىنشە، بۇگىندە قوعامدا قاتە تۇسىنىك قالىپتاسقان.

«بىرىنشىدەن، بەيبىت ۋاقىتتا اسكەري قىزمەتشىلەر ارميادا ءولىپ جاتىر، ەكىنشىدەن، جەكە قۇرامدا الىمجەتتىك بار دەگەن قوعامدا قاتە تۇسىنىك بار.

اسكەردەگى ءولىم-ءجىتىم، جاراقاتتانۋ سىندى اسكەري قىزمەتتەگى قاۋىپتى فاكتورلارعا توقتالايىن. ارميا - سپەتسيفيكالىق الەۋمەتتىك ورگانيزم. وندا ومىرىڭىزدە قاۋىپ تونەتىن جاعدايلار بولادى. بۇل - جاۋىنگەرلىك تەحنيكانى پايدالانۋ، جاتتىعۋلار، اتىس، مانيەۆر جانە شەرۋلەر. سونداي-اق اسكەري قىزمەتشىلەر ناقتى جاۋىنگەرلىك قۇرالداردى پايدالانادى»، - دەدى شايح-حاسان جازىقبايەۆ و ك ق- دە وتكەن باسپا ءسوز ءماسليحاتىندا.

گەنەرال-مايور اسكەردە اسكەريلەردىڭ ءولىمى جيىلەگەنىن جوققا شىعارمادى.

«اسكەري قىزمەتتە قولايلى جاعداي جاساۋ ءۇشىن قابىلدانىپ جاتقان شارالارعا قاراماستان، وكىنىشكە قاراي، اسكەري قىزمەتشىلەردىڭ قازا بولۋ فاكتىلەرى تىركەلىپ جاتىر. ارينە، سوڭعى جىلدارى اسكەري وقۋ-جاتتىعۋدىڭ قارقىندىلىعى كۇرت ءوستى. وسىلايشا، جاراقات الۋ قاۋپى ارتتى. بۇگىندە اسكەري قىزمەتشىلەردىڭ قازا بولۋىنىڭ بارلىق جاعدايى بەيبىت تۇرعىنداردىڭ ولىمىنە ۇقساس»، - دەدى ءمينيستردىڭ ورىنباسارى.

مينيسترلىك جاعدايدى تالداعاننان كەيىن اسكەري قىزمەتشىلەردىڭ ءولىمى مەن جاراقاتتانۋىنىڭ نەگىزگى سەبەبىن انىقتاعان. ولار تومەندەگىدەي:

قارۋ-جاراق پەن وق-دارىلەردى ابايسىز پايدالانۋ؛

تەحنيكانى پايدالانۋ كەزىندە قاۋىپسىزدىك ەرەجەسىن بۇزۋ؛

قىزمەتتەن تىس ۋاقىتتا جول-كولىك وقيعاسىنا ءتۇسۋ؛

اۋرۋ بويىنشا ءولىم-ءجىتىم؛

وتباسىنداعى قيىندىقتارعا بايلانىستى ءوز-وزىنە قول جۇمساۋ؛

«بەيبىت ۋاقىتتا اسكەري قىزمەتكەرلەردىڭ شىعىنى جاۋىنگەرلىك ەمەس شىعىندار دەپ اتالادى. كەز كەلگەن وقيعا بويىنشا مۇقيات تەكسەرۋ جۇرگىزىلىپ، اسكەري باسقارۋ ورگاندارىنىڭ ءبىرىنشى باسشىلارىنا قاتاڭ تارتىپتىك جانە كادرلىق شەشىمدەر قابىلدانادى. ءبىراق مۇندا ءبىز قانداي دا ءبىر شارا قابىلداماساق، ءبارى قىزمەت ەتەتىن ادامعا بايلانىستى ەكەنىن ءتۇسىنۋ كەرەك. اسكەرگە شاقىرىلعان ازاماتتار قازىردىڭ وزىندە قالىپتاسقان دۇنيەتانىممەن جانە وتباسىندا، مەكتەپتە، دوستارىنىڭ اراسىندا العان تاجىريبەمەن كەلەدى. ونداي جاعدايدا بارلىق شارا مەن تىيىم دارمەنسىز»، - دەپ ءسوزىن تۇيىندەدى شايح-حاسان جازىقبايەۆ.