اسكەردە ءجۇرىپ كوماعا تۇسكەن ەربايان مۇحتاردى قازاقستان مەديتسيناسى اياققا تۇرعىزا الا ما - مينيستر جاۋابى
استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىنان كەيىن وتكەن باسپا ءسوز ءماسليحاتىندا اسكەردە ءجۇرىپ كوماعا تۇسكەن ۇلتتىق ۇلان ساربازى ەربايان مۇحتاردىڭ جاعدايى تۋرالى پىكىر ءبىلدىردى.
- جاعدايى تۇراقتى. قوسىمشا وڭالتۋ- مەديتسينالىق قىزمەتتەردى الۋ قاجەت بولعانىنا بايلانىستى كۇنى كەشە ەرباياندى ۇلتتىق مەديتسينالىق ورتالىعىنا جاتقىزدىق. قاسىندا اكەسى بار. اۋرۋىنا بايلانىستى ءتيىستى كومەكتى الىپ جاتىر، - دەدى اقمارال ءالنازاروۆا.
جۋرناليست قازاقستان مەديتسيناسى جاس جىگىتتى اياققا تۇرعىزۋعا قانشالىقتى قاۋقارلى ەكەنىن سۇرادى.
- بۇگىنگى تاڭدا ونىڭ دياگنوزى وتە قيىن. جاراقاتپەن بىرگە ينفەكسيانىڭ بولعانىن ايتا كەتۋىمىز كەرەك. سوندىقتان ءتيىستى جۇمىستار ءجۇرىپ جاتىر. تۇركياعا دا بارىپ كەلدى. قازىر ءوزىمىز قوسىمشا قاراپ جاتىرمىز. قاجەت بولسا، تۇركياعا بولا ما، باسقا مەملەكەت بولا ما، بارىپ ەمدەلۋگە كومەك كورسەتۋ ماسەلەسىن، ۇيىمداستىرۋ جۇمىستارىن اتا-اناسىمەن تالقىلادىق. ولار قازاقستاندا ەم الۋعا كەلىسىمدەرىن بەردى. الدىن الا بولجام جاساماي-اق، قاجەتتى كومەكتىڭ تولىق بەرىلىپ جاتقانىن مالىمدەيمىن، - دەدى ۆەدومستۆو باسشىسى.
ەسكە سالساق، اسكەردە ءجۇرىپ، باسىنان جاراقات العان ۇلتتىق ۇلاننىڭ قاتارداعى جاۋىنگەرى ەربايان مۇحتار بىرنەشە اي بويى كومادا جاتقان بولاتىن.
جىل باسىندا ول ىستانبۇلداعى ەمىنىڭ العاشقى كەزەڭىن اياقتاپ، استاناعا ورالعان.
