اسكەرگە شاقىرىلاتىن ازاماتتاردى الدىن الا كۋرستان وتكىزۋ ۇسىنىلدى

استانا. قازاقپارات - اسكەرگە شاقىرىلاتىن ازاماتتاردى الدىن الا ءبىر ايلىق كۋرستان وتكىزۋ قاجەت. پرەزيدەنت جانىنداعى ادام قۇقىقتارى جونىندەگى كوميسسيا قورعانىس مينيسترلىگىنە وسىنداي ۇسىنىس تاستادى، دەپ حابارلايدى 24kz.

«بۇل ساربازدار اراسىنداعى كەلەڭسىزدىكتەردىڭ الدىن الۋ مەن ادام قۇقىعىنىڭ ساقتالۋىنا سەپتىگىن تيگىزەدى»، - دەيدى ماماندار. بيىل اسكەرگە 40 مىڭ جاس شاقىرىلعان.

ايتا كەتەيىك، بۇگىن ادام قۇقىقتارى جونىندەگى كوميسسيا وتىرىسى ءوتىپ، اسكەري قىزمەتشىلەردىڭ قۇقىعىن قورعاۋ ماسەلەسىن تالقىلادى. قورعانىس مينيسترلىگى بۇگىندە اسكەردەگى الىمجەتتىكتىڭ الدىن الۋ ءۇشىن ءبىرقاتار شارا قابىلداعان. بەينەباقىلاۋدى كۇشەيتىپ، «پيراميدا»، «سەرىكتەس»، «جاۋىنگەرلىك دوس» جۇيەسىن ىسكە قوستى. تالقىلاۋ بارىسىندا قاتىسۋشىلار ساربازداردىڭ مىنەز-قۇلقىنا باقىلاۋ جۇرگىزۋ مەن وفيتسەرلىك قۇرامىن نەعۇرلىم مۇقيات ىرىكتەۋ قاجەتتىگىن ايتتى.

تاستەمىر ابىشيەۆ، ق ر پرەزيدەنتى جانىنداعى ادام قۇقىقتارى جونىندەگى كوميسسيا ءتوراعاسىنىڭ ورىنباسارى:

- اسكەرگە جاڭادان كەلگەن بالا بولسىن، وفيتسەرلىك قۇرام بولسىن، بارلىعىنىڭ قۇقىعى بىردەي قورعالۋى كەرەك. زاڭدا دا 34-باپتا «اركىم قازاقستان رەسپۋبليكاسى كونستيتۋتسياسىنىڭ زاڭدارىن، باسقا ادامداردىڭ قۇقىقتارى مەن بوستاندىقتارىن جانە قادىر- قاسيەتىن قورعاۋعا مىندەتتى» دەلىنگەن. بۇل بارىمىزگە، اسكەري ادامدارعا دا قاتىستى.

تاربيە بالاباقشادان، مەكتەپ، كوللەدج، ۋنيۆەرسيتەتتەردەن باستالادى. وسىندا قىزمەت ەتىپ جۇرگەن اسكەري قىزمەتكەرلەر دە ءار 3-5 جىل سايىن بىلىكتىلىكتەرىن كوتەرىپ تۇرۋى كەرەك دەپ ويلايمىز.