اسكەرگە شاقىرۋ قاعيداسىنا تاعى دا وزگەرىستەر ەنگىزىلدى
استانا. KAZINFORM - كامەلەتكە تولعان ازاماتتاردى اسكەري قىزمەتكە شاقىرۋدى ۇيىمداستىرۋ جانە وتكىزۋ قاعيدالارىنا وزگەرىستەر ەنگىزىلدى.

وتان الدىنداعى بورىشىن وتەۋ جاسىنا جەتكەن ازاماتتاردى مەرزىمدى اسكەري قىزمەتكە شاقىرۋ تۇرعىلىقتى جەردەگى اسكەري باسقارۋ ورگاندارىنىڭ لاۋازىمدى تۇلعالارى ارقىلى جۇرگىزىلەتىنى ناقتىلاندى. اتاپ ايتقاندا، اۋىلداردا، كەنتتەردە جەرگىلىكتى اتقارۋشى ورگاندار ارقىلى نەمەسە جۇمىس (وقۋ) ورنىنداعى باسشىلىققا قولحات جىبەرۋ ارقىلى جۇزەگە اسىرىلادى.
سونداي-اق، شاقىرۋ كوميسسياسى ازاماتتاردى مەرزىمدى اسكەري قىزمەتكە شاقىرۋ جانە ولاردى قازاقستان رەسپۋبليكاسىنىڭ قارۋلى كۇشتەرىنىڭ، وزگە دە اسكەرلەرى مەن اسكەري قۇرالىمدارىنىڭ ءتيىستى تۇرلەرى مەن تەكتەرىنە ءبولۋ تۋرالى شەشىم قابىلداۋ كەزىندە ولاردىڭ ماماندىعى مەن دەنساۋلىق جاعدايىنا باسىمدىق بەرىلەدى.
ۇكىمەت قاۋلىسىندا اسكەرگە شاقىرۋدىڭ ەكىنشى كەزەڭىن وتكىزۋ مەرزىمى بەلگىلەندى:
ەكىنشى كەزەڭ قورعانىس ىستەرى جونىندەگى دەپارتامەنتتەردىڭ جيىن پۋنكتىندە جىل سايىن كوكتەمدە 1-ناۋرىزدان 30-ماۋسىمعا دەيىن، سونداي-اق كۇزدە 1-قىركۇيەكتەن 31-جەلتوقسانعا دەيىن وتكىزىلەدى.
بۇرىن ەكىنشى كەزەڭ 1-ناۋرىزدان كوكتەمگى شاقىرۋ كومانداسىن جونەلتۋ اياقتالعانعا دەيىن، ال كۇزگى شاقىرۋ 1-قىركۇيەكتەن كۇزگى شاقىرۋ كومانداسىن جونەلتۋ اياقتالعانعا دەيىن جۇرگىزىلەتىن.
بۇيرىق 2025-جىلعى 2-تامىزدا كۇشىنە ەنەدى.
ايتا كەتسەك، عىلىم جانە جوعارى ءبىلىم ءمينيسترى ساياسات نۇربەك ستۋدەنتتەردى اسكەرگە كوشەدەن الىپ كەتۋگە قاتىستى جاڭا شەشىم ۇسىنعان ەدى.
بەلگىلى بولعانداي 20 مىڭ جىگىت اسكەردەن قاشىپ ءجۇر.
ەسكە سالايىق، بيىل 17-شىلدەدە پرەزيدەنت اسكەري-پاتريوتتىق تاربيە باعىتىنداعى جۇمىستى كۇشەيتۋدى كوزدەيتىن زاڭعا قول قويدى.