اسحات ايماعامبەتوۆ: سمارتفون كىتاپتان ارزان بولماۋى كەرەك

استانا. KAZINFORM - ءماجىلىس دەپۋتاتى اسحات ايماعامبەتوۆ انيماتسيالىق ستۋديالارعا سالىق جەڭىلدىگىن بەرۋدى ۇسىندى.

- قازاقشا مۋلتفيلمدەر از - ال سالىق كوپ. بۇگىندە بالالاردىڭ كوبى باسقا تىلدەگى TikTok پەن Netflix عانا كورەدى. مەملەكەتتىك تىلدە كونتەنت از. نەگە؟ ءبىزدىڭ انيماتسيالىق ستۋديالار ءار كادر ءۇشىن ققس تولەيدى. قازاقشا مۋلتفيلم شىعارۋ - قىمبات. وڭتۇستىك كورەيا، پولشا، فرانسيا - ءوز انيماتسياسىن قورعايدى. بىزگە دە سول قاجەت، - دەدى ول پالاتانىڭ جالپى وتىرىسىندا.

سونداي-اق، كازينولارعا سالىقتى اياماي كوتەرۋ كەرەكتىگىن ايتتى.

- كازينولارعا سالىقتى باتىل كوتەرەيىك! مۇندا ەشقانداي داۋ جوق. %20، %30، %50 - كوتەرۋگە بولادى. ويتكەنى ءاربىر ۇتىلعان ستاۆكا - ءبىر وتباسىنىڭ ءۇمىتى.

بۇل - بيزنەس ەمەس. بۇل - ءۇمىتتى جۇتاتىن يندۋستريا. قۇرمەتتى ارىپتەستەر، ءبىزدىڭ ۇسىنىپ وتىرعانىمىز - جەڭىلدىك ەمەس، ادىلەتتىلىك. سالىق جۇيەسى مۇقتاجعا دەمەۋ بولۋى ءتيىس. سمارتفون - كىتاپتان ارزان بولماۋى كەرەك. ەنەرگەتيكالىق سۋسىن - سۋدان ارزان بولماۋى كەرەك. وسى ۇسىنىستاردى قولدايىق، - دەدى دەپۋتات.

ايتا كەتەيىك، سالىق كودەكسىنىڭ جاڭا رەداكسياسى قابىلدانسا، ق ق س سالىناتىن اينالىمنىڭ تومەنگى شەگى 40 ميلليون تەڭگە بولۋى مۇمكىن.