اسحات ايماعامبەتوۆ رەسەيلىك پەداگوگتەردى قازاقستاندىق مەكتەپتەرگە تارتۋ تۋرالى ۇسىنىسقا پىكىر ءبىلدىردى
ءماجىلىس دەپۋتاتى اسحات ايماعامبەتوۆ قازاقستاننىڭ وڭتۇستىك وڭىرلەرىندە اشىلۋى مۇمكىن ورىس مەكتەپتەرىنە رەسەيلىك پەداگوگتەردى تارتۋ تۋرالى ۇسىنىسقا پىكىر ءبىلدىردى، دەپ حابارلايدى Kazinform.
الەۋمەتتىك جەلىدە وقۋ- اعارتۋ ءمينيسترى عاني بەيسەمبايەۆتىڭ ەلدىڭ وڭتۇستىگىندە اشىلۋى مۇمكىن مەكتەپتەرگە رەسەيلىك پەداگوگتەردى شاقىرۋ تۋرالى ايتقان ءسوزى تاراپ ءجۇر. ادىلەت مينيسترلىگىندە وتكەن ۆەدومستۆوارالىق كوميسسيا وتىرىسنان كەيىن جۋرناليستەر ءماجىلىس دەپۋتاتى اسحات ايماعامبەتوۆكە وسى ماسەلە تۋرالى سۇراق قويدى.
«قازاقستاننىڭ مەملەكەتتىك مەكتەپتەرىندە شەتەلدىك ازاماتتاردىڭ ساباق بەرۋى زاڭدى ما؟»، - دەپ سۇرادى ب ا ق وكىلى.
«بۇل ماسەلەنى باسقاشا قويۋ كەرەك. جالپى قازاقستاندا باسقا مەملەكەتتەردىڭ ازاماتتارى جۇمىس ىستەي الا ما؟ بۇل ەڭبەك كودەكسىنىڭ شەڭبەرىندە بار. وزدەرىڭىز كورىپ جۇرسىزدەر. قازاقستاندا باسقا مەملەكەتتەردىڭ ازاماتتارى ءتۇرلى سالالاردا جۇمىس ىستەپ جاتىر. ەگەر شەتەلدىكتەر ءبىزدىڭ زاڭناماعا سايكەس كەلسە، ءتيىستى تالاپتارى بار، سول تالاپتارعا سايكەس بولسا، وندا مينيسترلىك ءوزىنىڭ زاڭنامالىق- قۇقىقتىق اكتىلەرىندە قاراستىرۋ كەرەك»، - دەدى ول.
دەپۋتات جەكە مەنشىك مەكتەپتەردە شەتەلدىك ازاماتتاردىڭ ءبىلىم بەرۋى زاڭدى ەكەنىن اتاپ ءوتتى.
«مىسالى، نازاربايەۆ مەكتەپتەرىندە قۇراما شتاتتاردىڭ، فرانسيانىڭ قىزمەتكەرلەرى بولدى، قازىر دە بار. باسقا دا مەكتەپتەردە جەكە مەنشىك مەكتەپتەردە جۇمىس ىستەپ جاتىر. سوندىقتان بۇل مينيسترلىك تۋرالى جاۋاپ بەرسەم، كەزىندە ءوزىم باسشىلىق جاساعان سۇراقتارعا قىستىرىلعانداي بولامىن. مينيسترلىكتىڭ وزىنە جۇگىنگەنىڭىز دۇرىس»، - دەدى اسحات ايماعامبەتوۆ.
اۆتور
ەسىمجان ناقتىباي
