ارىستانبەك مۇحامەدي ۇلى 11 جىلعا سوتتالدى

استانا. KAZINFORM - بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى 11 جىلعا باس بوستاندىعىنان ايىرىلدى.

استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى بۇرىنعى مينيستر مەن ونىڭ سىبايلاستارىنا قاتىستى ۇكىم شىعاردى.

«سوت ۇكىمىمەن م. اسا ءىرى مولشەردە پارا بەرۋگە وقتالعانى ءۇشىن كىنالى دەپ تانىلىپ، قىلمىستىق كودەكستىڭ 58-بابىنىڭ 3 جانە 6-بولىكتەرى نەگىزىندە، .2023-جىلعى 20 ماۋسىمدا استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ ۇكىمىمەن تاعايىندالعان قاتاڭ جازانى نەعۇرلىم قاتاڭ جازاعا ءسىڭىرۋ جولىمەن قىلمىستىق قۇقىق بۇزۋشىلىقتار جيىنتىعى بويىنشا ءومىر بويىنا مەملەكەتتىك قىزمەتتە لاۋازىمداردى اتقارۋعا تىيىم سالىنا وتىرىپ، 11 جىلعا باس بوستاندىعىنان ايىرىلدى»، - دەلىنگەن سوت ۇكىمىندە.

ودان بولەك، ونىڭ جۇبايى عاليا ىسقاقوۆا پاراقورلىققا دەلدالدىق جاساعانى ءۇشىن كىنالى دەپ تانىلىپ (ق ك 368-بابىنىڭ 1-بولىگى)، ءومىر بويى مەملەكەتتىك قىزمەتتە قىزمەت اتقارۋعا تىيىم سالىنىپ، 6 ايعا باس بوستاندىعىنان ايىرىلدى.

سونداي-اق، سوت ۇكىمىمەن ا. مۇحامەدي ۇلىنىڭ ادۆوكاتى مۇستاحيم تولەيەۆ اسا ءىرى مولشەردە الاياقتىق جاساعانى ءۇشىن كىنالى دەپ تانىلىپ (ق ك 190-بابى 4-بولىگىنىڭ 2) تارماعى)، 10 جىل مەرزىمگە ادۆوكاتتىق قىزمەتپەن اينالىسۋ قۇقىعىنان ايىرىلا وتىرىپ، 6 جىل 8 ايعا باس بوستاندىعىنان ايىرىلدى.

ۇكىم زاڭدى كۇشىنە ەنگەن جوق.

ەسكە سالا كەتەيىك، ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى 2022-جىلى 28- مامىردا قاماۋعا الىنعان ەدى.

انتيكور مۋزەي باسشىسىنا «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ بارىسىندا قارجى جىمقىردى دەگەن ايىپ تاقتى.

دەگەنمەن ارىستانبەك مۇحامەدي ۇلى سوتتا كىناسىن مويىندامادى.

سونداي-اق سوت ارىستانبەك مۇحامەدي ۇلىن ءۇي قاماققا اۋىستىرۋدان باس تارتتى.