پاريجدە قازاقستاننان 54 سپورتشى العاشقى وليمپياداسىندا باق سىنايدى

استانا. KAZINFORM - فرانسيا استاناسى پاريج قالاسىندا وتەتىن ХХХІІІجازعى وليمپيادا ويىندارىنا ىرىكتەۋ تۋرنيرلەرى تولىعىمەن اياقتالدى. قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىز سوڭعى وقۋ-جاتتىعۋ جيىندارىن وتكىزىپ جاتىر.

قازاقستان قۇراماسى وليمپيادا ويىندارىنا سپورتتىڭ 25 تۇرىنەن 80 جولداما جەڭىپ العان بولاتىن.

وسى ورايدا، ق ر ۇلتتىق وليمپيادالىق كوميتەتى وليمپياداعا جولداما العان سپورتشىلارىمىزدىڭ باستى ەرەكشەلىكتەرىن اتاپ ءوتتى.

بيىلعى وليمپياداعا باراتىن سپورتشىلارىمىزدىڭ باستى ەرەكشەلىكتەرى:

بوكستان قازاقستان ەرلەر قۇراماسى وليمپياداعا تولىق قۇرامدا بارادى

بوكستان قازاقستان ايەلدەر قۇراماسى تۇڭعىش رەت جازعى ويىندارعا ءۇش سپورتشىنى اپارادى

برەيكينگ پەن بادمينتوننان قازاقستان تۇڭعىش رەت وليمپيادا جولداماسىن يەلەندى.

برەيكينگتەن امير زاكيروۆ، بادمينتوننان دميتري پانارين ەل نامىسىن قورعايدى.

ايەلدەر كۇرەسىنەن قازاقستان كومانداسى تاريحتا تۇڭعىش رەت وليمپيادادان سىرت قالدى.

سەمسەرلەسۋدەن قازاقستان قۇراماسى تاريحتا تۇڭعىش رەت كوماندالىق جارىستا باق سىنايدى.

قازاقستان تۇڭعىش رەت گيمناستيكانىڭ ءۇش تۇرىنەن (باتۋتتىق، سپورتتىق جانە كوركەم) جازعى وليمپيادادا سىنعا تۇسەدى.

نىسانا كوزدەۋدەن قازاقستان كومانداسى تۇڭعىش رەت التى سپورتشىنى وليمپياداعا اپارادى.

پاريج وليمپياداسىنا قاتىساتىن 80 قازاقستاندىق سپورتشىنىڭ ىشىندە 54 اتلەت جازعى ويىندارعا تۇڭعىش رەت قاتىسقالى وتىر.

قازاقستان وليمپيادالىق قۇراماسىنىڭ ساپىندا جازعى ويىندارعا ءتورتىنشى رەت قاتىساتىن ەكى سپورتشى بار. ولار - جەڭىل اتلەت ولگا سافرونوۆا مەن اكادەميالىق ەسۋ شەبەرى ۆلاديسلاۆ ياكوۆليەۆ.

ەلدوس سمەتوۆ (دزيۋدو)، كيريلل گەراسيمەنكو (ۇستەل تەننيسى) جانە ەلەنا پوتاپەنكو (قازىرگى بەسسايىس) وليمپيادا ويىندارىنا ءۇشىنشى رەت قاتىسپاق.

21 سپورتشى ءوز مانسابىنداعى ەكىنشى وليمپياداعا اتتانادى.

اۆتور كۇنسۇلتان وتارباي