پاريجدە مەكتەپ مۇعالىمىنىڭ ولىمىنە كۇدىكتى التى جاس ءوسپىرىمنىڭ سوتى باستالدى

پاريجدە 2020 -جىلى قىلمىسكەر قولىنان قازا تاپقان مەكتەپ مۇعالىمى ساميۋەل پاتيدىڭ ءولىمى بويىنشا التى جاسوسپىرىمگە قاتىستى سوت ءىسى باستالدى. Kazinform بۇل تۋرالى BBC-گە سىلتەمە جاساپ.

ساميۋەل پاتي ساباق كەزىندە وقۋشىلارعا مۇحاممەد پايعامباردىڭ كاريكاتۋراسىن كورسەتكەنى ءۇشىن شەشەنستان تۋماسى ونىڭ باسىن كەسىپ العان. بۇل جان تۇرشىگەرلىك وقيعا پاريج ماڭىنداعى كونفلان-سەنت-ونورين قالاسىندا بولدى.

سول كەزدە 18 جاستا بولعان انزوروۆتى پوليتسيا قىلمىس ورنىندا اتىپ تاستادى.

جاسوسپىرىمدەر قىلمىسكەرگە مۇعالىمدى كورسەتكەنى ءۇشىن ايىپتالىپ وتىر. ساميۋەل پاتي قازا تاپقان كەزدە وقۋشىلار 13-15 جاس شاماسىندا ەدى، ولار ەكى جارىم جىلعا دەيىن باس بوستاندىعىنان ايىرىلۋى مۇمكىن.

جەرگىلىكتى ب ا ق حابارلاۋىنشا، ولار جاسوسپىرىمدەر ءىسى بويىنشا سوتقا كەلگەندە بەت-ءجۇزىن جاسىرۋعا تىرىسقان. ەڭ جاس كۇدىكتى پاتي ولتىرىلگەن كەزدە 13 جاستا عانا بولدى. ول مۇعالىمى قازا تاپپاي تۇرىپ توعىز كۇن بۇرىن باسقا سەبەپپەن ساباقتان شەتتەتىلگەن ەكەن.

ايىپتاۋلار بويىنشا، وقۋشى ساميۋەل پاتي ءوزىن ساباقتان قۋىپ جىبەرگەنىن ايتىپ، اكەسى براحيما چيناعا شاعىمدانعان. ونىڭ سوزىنشە، مۇعالىم مۇسىلمانداردىڭ ءبارى سىنىپتان شىعىپ كەتۋ كەرەك دەپ ايتقاننان كەيىن ەكەۋى سوزگە كەلىپ قالعان. ءبىراق شىن مانىندە ول سول كۇنى ساباققا قاتىسپاعان بولىپ شىقتى.

سودان كەيىن قىزدىڭ اكەسى الەۋمەتتىك جەلىگە بەينەروليك جۇكتەپ، پاتيدى جۇمىستان شىعارۋعا شاقىردى.

پروكۋرورلاردىڭ پىكىرىنشە، وسى ۆيدەو شەشەن ابدۋللاح انزوروۆتى نورمانديادان كونفلان-سەنت-ونورين قالاسىنا 80 شاقىرىم جولدى ارتقا تاستاپ كەلىپ، قىلمىس جاساۋىنا سەبەپ بولعان.

باسقا بەس كۇدىكتى انزوروۆقا مەكتەپتە پاتيدى تانۋعا كومەكتەسىپ، 300 ەۋرو كولەمىندە سىياقى العان. ولاردىڭ ءبىرىنىڭ ايتۋىنشا، انزوروۆ وعان مەسە پاتي مۇحاممەد پايعامباردىڭ كاريكاتۋراسىن كورسەتكەنى ءۇشىن كەشىرىم سۇراپ جاتقانىن ۆيدەوعا تۇسىرگىسى كەلەتىنىن ايتقان.

كەلەسى جىلى فرانسيادا وسى ولىمگە قاتىسى بار سەگىز ەرەسەك ادامعا قاتىستى ەكىنشى سوت پروتسەسى باستالادى. ولاردىڭ قاتارىندا قىزدىڭ اكەسى براحيما چينا دا بار.

پروكۋرورلار انزوروۆتىڭ ەكى دوسىن دا ادام ولتىرۋگە كومەكتەسكەنى ءۇشىن ايىپتاپ وتىر.

ولاردىڭ ءبىرى انزوروۆقا قارۋ ساتىپ الۋعا جاردەمدەسسە، ەكىنشىسى ساميۋەل پاتي ساباق بەرگەن مەكتەپكە جەتكىزىپ تاستاعان.

 

 

اۆتور

بالنۇر قوجاگەلدى