پاريج وليمپياداسىندا سپورتشىلار قاي ستاديونداردا جۇلدەگە تالاسادى
استانا. KAZINFORM - سپورت جانكۇيەرلەرى اسىعا كۇتكەن ءدۇبىرلى دودانىڭ باستالۋىنا ساناۋلى كۇن قالدى. Kazinform اگەنتتىگىنىڭ تىلشىلەرى وقىرماندارعا وليمپياداعا قاتىستى قىزىقتى اقپاراتتاردى ۇسىنىپ كەلەدى. بۇل جولى سپورتتىق ويىندار وتەتىن ستاديوندارعا توقتالماقپىز.
Stade de France
ستاديون پاريجدىڭ سولتۇستىگىندەگى سەن- دەني ماڭىندا ورنالاسقان. ول 1998 -جىلى فرانسيادا وتكەن فۋتبولدان الەم چەمپيوناتى ءۇشىن سالىنعان. قازىرگى ۋاقىتتا ارەنا ەلدەگى ەڭ ءىرى سپورتتىق ءىس-شارالاردى، فرانسيا ۇلتتىق فۋتبول جانە رەگبي كوماندالارىنىڭ ۇيدەگى ماتچتارىن وتكىزۋ ءۇشىن پايدالانىلادى.
ستاديوننىڭ كونفيگۋراتسياسى جەڭىل اتلەتيكا جارىستارىن وتكىزۋگە مۇمكىندىك بەرەدى. ماسەلەن، 2003 -جىلى جەڭىل اتلەتيكادان الەم چەمپيوناتى وسىندا ءوتتى. ارەنا سىيىمدىلىعى وقيعاعا بايلانىستى وزگەرىپ وتىرادى. ماسەلەن، 81338 ورىن (فۋتبول جانە رەگبي)، 75000 ورىن (جەڭىل اتلەتيكا) جانە اۋقىمدى كونسەرتتەرگە 90000 عا دەيىن ورىن قاراستىرىلعان.
بۇل ستاديوندا وليمپيادا ويىندارىنىڭ اشىلۋ جانە جابىلۋ سالتاناتى، سونداي-اق جەڭىل اتلەتيكا، سونىمەن قاتار ەرلەر مەن ايەلدەر اراسىنداعى رەگبي 7 تۋرنيرى وتەدى.
Paris La Defense Arena
كوپ ماقساتتى جابىق ستاديون نانتەردە ورنالاسقان. ارەنا 2013 جانە 2017 -جىلدار ارالىعىندا «Racing 92» رەگبي كلۋبى ءۇشىن سالىنعان. بۇل ستاديون اشىلعانعا دەيىن ماسكەۋدەگى وليمپيادا ستاديونى ەۋروپاداعى ەڭ ۇلكەن جابىق ستاديون بولىپ سانالىپ كەلگەن-دى.
ارەنانىڭ سىيىمدىلىعى رەگبي جارىستارى ءۇشىن 32000 ورىنعا، ال كونسەرتتەر ءۇشىن 40000 ورىنعا تەڭ.
وليمپيادا ويىندارى اياسىندا ستاديوندا سۋدا جۇزۋدەن جارىستار جانە سۋ دوبىنان ەرلەر مەن ايەلدەر اراسىنداعى تۋرنيرلەردىڭ فينالى وتەدى.
Stade Olympique Yves-du-Manoir
ستاديون پاريجدىڭ لا-گارەن-كولومبە ماڭىندا ورنالاسقان. ول 1907 -جىلى سالىنعان جانە اتاقتى فرانسۋز رەگبيشىسى يۆ ديۋ مانۋاردىڭ ەسىمىمەن اتالادى. بۇل - فرانسيانىڭ تومەنگى ليگالارىندا وينايتىن «Racing Club de France» فۋتبول كلۋبىنىڭ ستاديونى.
قازىرگى سىيىمدىلىعى - شامامەن 15000 كورەرمەن. ستاديون بىرنەشە رەت قايتا جاڭعىرتىلعان.
2024 -جىلعى وليمپيادا ويىندارى كەزىندە بۇل ارەنادا دوپتى حوككەيدەن ماتچتار وتكىزىلەدى.
Palais Omnisports de Paris-Bercy
پاريجدىڭ 12-اۋدانىنداعى بەرسي بۋلۆارىنداعى جابىق سپورت ارەناسى 1984 -جىلى سالىنعان. بۇل نىسان ءىرى جارىستار مەن مادەني ءىس-شارالاردى وتكىزۋ ءۇشىن پايدالانىلادى. مۇندا جەڭىل اتلەتيكادان باسكەتبولعا، شايبالى حوككەيدەن موتوكروسسقا دەيىن تۋرنيرلەر، ەرلەر اراسىنداعى تەننيستەن ATP Tour حالىقارالىق تۋرنيرى جانە ايەلدەر اراسىنداعى گاندبولدان 2018 -جىلعى ەۋروپا چەمپيوناتىنىڭ سوڭعى راۋندتارى وتكەن.
ارەنانىڭ سىيىمدىلىعى وقيعاعا بايلانىستى 7000 نان 20300 ادامعا دەيىن وزگەرەدى.
2024 -جىلعى وليمپيادا ويىندارى اياسىندا ستاديوندا باسكەتبولدان فينالدىق ويىندار مەن كوركەم گيمناستيكادان جارىستار وتكىزىلەدى.
Château de Versailles
ۆەرسال سارايى 1682 -جىلى ليۋدوۆيك XIV سارايىنىڭ رەزيدەنتسياسىنا اينالدى. ال 1883 -جىلدان باستاپ ساراي جانە باقتارى ۇلتتىق مۇراجايعا اينالىپ، 1979 -جىلى يۋنەسكو-نىڭ دۇنيەجۇزىلىك مۇرا مارتەبەسىن العان العاشقى فرانسۋز نىسانى رەتىندە تاريحقا ەندى.
وليمپيادا ويىندارىن وتكىزۋ ءۇشىن ساراي اۋماعىنداق ۋاقىتشا ارەنا سالىنعان. ونىڭ سىيىمدىلىعى وقيعاعا بايلانىستى 15000 نان 40000 كورەرمەنگە دەيىن وزگەرىپ تۇرادى. مۇندا ات سپورتى مەن زاماناۋي بەسسايىس بويىنشا وليمپيادالىق تۋرنيرلەر وتەدى.
Grand Palais Ephemere
عيمارات 2021 -جىلى ساۋلەتشى جان-ميشەل ۆيلموتتىڭ جوباسى بويىنشا سالىنعان. وليمپيادادان كەيىن قۇرىلىم جويىلادى. وليمپيادا ويىندارى كەزىندە مۇندا دزيۋدو، گرەك-ريم جانە ەركىن كۇرەستەن جارىستار وتەدى. نىساننىڭ سىيىمدىلىعى شامامەن 8356 ادامدى قۇرايدى.
Chateauroux Shooting Centre
شاتورۋداعى ۇلتتىق اتۋ ورتالىعى وليمپيادا ويىندارى كەزىندە وق اتۋدان جارىساتىن 340 وليمپياداشى مەن 160 پاراليمپياداشىنى قابىلدايدى. 2018 -جىلى فرانسۋز Bulleting فەدەراتسياسى اشقان بۇل بىرەگەي كەشەن ەۋروپاداعى ەڭ ۇلكەن كەشەندەردىڭ ءبىرى بولىپ تابىلادى.
ورتالىق بىرنەشە اتىس تيرلەرىمەن جابدىقتالعاندىقتان مۇندا اتۋدان جارىستاردىڭ بارلىق ءتۇرىن وتكىزۋگە بولادى. 2022 -جىلى كەشەندە جاڭا زال سالىندى، وندا 2024 -جىلى مىلتىق پەن تاپانشادان اتۋ جارىستارىنىڭ وليمپيادا جانە پاراليمپيادا فينالى وتەدى.
Grand Palais
پاريجدىڭ قاق ورتاسىنداعى عيمارات 1900 -جىلى پاريجدەگى امبەباپ كورمەگە ارنالىپ سالىنعان. قۇرىلىم 2024 -جىلعى وليمپيادا ويىندارىنا دەيىن ەشقاشان جاڭارتىلماعان.
ساراي كوپتەگەن ءتۇرلى سپورتتىق جانە مادەني ءىس-شارالاردى وتكىزۋ ورنى رەتىندە پايدالانىلادى: جىل سايىن الەمنىڭ ءار تۇكپىرىنەن كەلگەن سۋرەتشىلەردىڭ ءبىرقاتار كورمەلەرى وتەدى، ال 2010 -جىلى سەمسەرلەسۋدەن الەم چەمپيوناتى ۇيىمداستىرىلدى.
وليمپيادا كەزىندە عيماراتتىڭ سىيىمدىلىعى 8000 ادامعا دەيىن جەتەدى. مۇندا سەمسەرلەسۋ مەن تاەكۆوندودان جارىستار وتەدى.
Paris Expo Porte de Versailles
كورمە- كونفەرەنتسيا ورتالىعى پاريجدىڭ 15-اۋدانىندا، پورت- دە- ۆەرسال مەترو ستانسياسىندا ورنالاسقان. بۇل - 1923 -جىلى پاريج ساۋدا جارمەڭكەسىن وتكىزۋ ءۇشىن سالىنعان فرانسياداعى ەڭ ۇلكەن ساياباق. ونىڭ اۋدانى 35 گەكتاردى قۇرايدى.
وليمپيادا ويىندارى كەزىندە مۇندا گاندبول، اۋىر اتلەتيكا، ۆولەيبول جانە ۇستەل تەننيسىنەن جارىستار وتەدى. ورتالىقتىڭ ءبىر بولىگى وليمپيادا ءۇشىن ارنايى قايتا جاڭعىرتىلدى. سىيىمدىلىعىنا توقتالساق، ۆولەيبول تۋرنيرى ءۇشىن 12000 ادامدى، گاندبولدان 7800 گە دەيىن جانە ۇستەل تەننيسى مەن اۋىر اتلەتيكادان 6000 ادامعا دەيىن قابىلدايدى.
Les Invalides
پاريجدەگى ەڭ ادەمى ەسكەرتكىشتەردىڭ ءبىرى، مۇگەدەكتەر سارايىنا قاراما-قارسى ورنالاسقان. وليمپيادا ۋاقىتىندا ساداق اتۋ، تاس جول ۆەلوسپورتى جانە جەڭىل اتلەتيكا (مارافون) بويىنشا جارىستاردىڭ ارەناسىنا اينالادى. ورىننىڭ سىيىمدىلىعى شامامەن 8000 ادامدى قۇرايدى.
Nautical Stadium Vaires-sur- Marne
Vere-sur-Marne ستاديونى 4400 شارشى مەتردى قۇرايتىن سپورت ورتالىعى. 2019 -جىلدىڭ ماۋسىم ايىندا سالىنعان. ستاديوندا بايداركا مەن كانوە ەسۋدەن وليمپيادالىق جارىستار وتەدى.
بەيجىڭ جانە سيدنەيمەن قاتار ول وليمپيادالىق جانە پاراليمپيادالىق بايداركا مەن كانوەدە ەسۋ، ونىڭ ىشىندە سلالوم بويىنشا جارىستار وتكىزەتىن الەمدەگى ۇزدىك ءۇش سپورتتىق نىساننىڭ ءبىرى.
Place de la Concorde
پاريجدەگى ەڭ ۇلكەن الاڭ قالانىڭ 8-اۋدانىندا، ەليسەي دالاسىنىڭ شىعىس بولىگىندە ورنالاسقان. بۇل ورىن فرانسۋز توڭكەرىسى كەزىندەگى كورول ليۋدوۆيك XVI، ماري انتۋانەتتا جانە ماكسيميليەن روبەسپەردى قوسا العاندا، كوپشىلىكتىڭ ءولىم جازاسىنا كەسىلگەن ورنى رەتىندە تانىمال.
وليمپيادادا بۇل قالالىق ساياباقتا 27-شىلدەدەن 10-تامىز سەنبىسىنە دەيىن ءۇزىلىسسىز سپورتتىق جارىس وتەدى - سكەيتبوردينگ، BMX- فريستايل جانە 3×3 باسكەتبول. ورىننىڭ سىيىمدىلىعى 30 مىڭ ادامعا دەيىن جەتەدى.
The Porte de La Chapelle Arena
ارەنا ەكو-ستيلدە جوبالانعان (قاسبەتى قايتا وڭدەلەتىن اليۋمينيمەن قاپتالعان جانە قۇرىلىس ماتەريالدارىنىڭ كوپشىلىگى بيو نەگىزىندە)، 2024 -جىلدىڭ باسىندا اشىلعان. پاريجدىڭ لا-شاپەلل اۋدانىندا ورنالاسقان قۇرىلىمنىڭ سىيىمدىلىعى 8 مىڭ ادامعا دەيىن جەتەدى.
وليمپيادادان كەيىن ارەنا «پاريج» باسكەتبول كلۋبىنىڭ ۇيدەگى ويىندارىن وتكىزەتىن ارەناعا اينالادى.
وليمپيادا ويىندارى اياسىندا ستاديوندا بادمينتون (6700 كورەرمەنگە دەيىن) جانە كوركەم گيمناستيكادان (7000 كورەرمەنگە دەيىن) جارىستار وتەدى.
Le Bourget Sport climbing venue
1982 -جىلى سالىنعان نىسان 2024 -جىلعى وليمپيادا ويىندارى ءۇشىن ارنايى تۇرلەندىرىلىپ، تەك جارىس ۋاقىتىندا عانا پايدالانىلادى. سپورتتىق ورمەلەۋ ورتالىعى پاريج- شارل دە گولل اۋەجايىنىڭ جانىندا ۆيلپەنتەدەگى لە بۋرجە جاڭا سپورت ساياباعىندا ورنالاسقان.
ورمەلەۋ قابىرعاسى ويىندارعا بىرنەشە كۇن قالعاندا ورناتىلۋى كەرەك. كورەرمەندەردى ورنالاستىرۋ ءۇشىن سىيىمدىلىعى 6000 ادامدىق تريبۋنا ورناتىلادى.
Stade Roland Garros
ستاديون - بۋا-دە-بۋلوننىڭ شەتىندە ورنالاسقان تەننيس كورتتارىنىڭ كەشەنى. مۇندا جىل سايىن ءداستۇرلى تۇردە French Open تۋرنيرى وتەدى. رولان گارروس 1928 -جىلى سالىنعان جانە فرانسۋز ۇشقىشى جانە ءبىرىنشى دۇنيەجۇزىلىك سوعىس باتىرى رولان گارروستىڭ قۇرمەتىنە اتالعان.
ورتالىق تەننيستىڭ قاجەتتىلىكتەرىنە نازار اۋدارا وتىرىپ، بىرنەشە رەت قايتا قۇرىلدى جانە وزگەرتىلدى. ستاديوندا بارلىعى 24 تەننيس كورتى بار، ونىڭ ۇشەۋىن ءىرى ماتچتار ءۇشىن پايدالانۋعا بولادى. وليمپيادا ويىندارى كەزىندە ستاديوندا تەننيس پەن بوكستان جارىستار وتەدى.
North Paris Arena
ويىندار ءۇشىن Paris NorthVillepinte كورمە ورتالىعى Paris North Arena دەپ اتالاتىن ۇلكەن مودۋلدىك سپورتتىق نىسانعا اينالادى. فرانسياداعى ەڭ ۇلكەن ورتالىقتا توعىز پاۆيلون بار.
وليمپيادا ويىندارى اياسىندا بوكس تۋرنيرىنىڭ الدىن الا راۋندتارى مەن زاماناۋي بەسسايىس سەمسەرلەسۋ كەزەڭى، سونداي-اق پاراليمپيادا ويىندارى اياسىندا وتىرىپ ۆولەيبول تۋرنيرى وتەدى.
Velodrome de Saint-Quentin-en-Yvelines
مونتيني- لە- برەتوننە ۆەلودرومى 2011-2014 -جىلدار ارالىعىندا سالىنعان. سودان بەرى ول 2015، 2022 -جىلعى ۆەلوسپورتتان الەم چەمپيوناتىن جانە 2016 -جىلعى جەڭىل اتلەتيكادان ەۋروپا چەمپيوناتىن قابىلدادى. سونداي-اق بۇل نىسان - فرانسيا ۆەلوسپورت فەدەراتسياسىنىڭ شتاب-پاتەرى جانە ۇلتتىق قۇرامانىڭ جاتتىعۋ ورتالىعى.
ارەنانىڭ سىيىمدىلىعى شامامەن 5000 كورەرمەندى قۇرايدى. مۇندا وليمپيادا ويىندارى اياسىندا ەرلەر مەن ايەلدەر اراسىندا ۆەلوسپورتتان جارىستار وتەدى.
Pont Alexandre III
سەنا وزەنىنىڭ ەكى جاعالاۋى اراسىنداعى كوپىر پاريجدىڭ قاق ورتاسىندا ورنالاسقان جانە سانسىز ەسكەرتكىشتەرمەن قورشالعان. ول 1900 -جىلعى دۇنيەجۇزىلىك كورمە ءۇشىن اشىلعاننان بەرى قالانىڭ ەڭ ەستە قالاتىن وقيعالارىنىڭ ءبىر بولىگى بولدى جانە ءوز الدىنا ونەر تۋىندىسى مەن ساۋلەتتىك ەسكەرتكىش بولىپ تابىلادى.
ەنى 45 مەتر جانە ۇزىندىعى 107 مەتر كوپىر ءتورت باعانمەن جانە تىرەۋىش التىن قولا مۇسىندەرمەن شەكتەلگەن. مۇندا وليمپيادا ويىندارى كەزىندە ۆەلوسپورت، ترياتلون جانە اشىق سۋدا ءجۇزۋ ءتۋرنيرى وتەدى.
The Hotel de Ville
تاريحي عيمارات پەن ونىڭ اتىمەن اتالاتىن الاڭ سەنا وزەنىنىڭ بويىندا ورنالاسقان. بۇل جەردە جۇگىرۋ مارافونى باستالادى.
Trocadéro
بۇل الاڭدا وليمپيادا ويىندارى كەزىندە ۆەلوسپورت پەن جەڭىل اتلەتيكادان جارىستار (20 شاقىرىمدىق جۇگىرۋ جولى) ءۇشىن پايدالانىلادى.
ونىڭ سىيىمدىلىعى شامامەن 3349 ادامدى قۇرايدى. الاڭ تۋريستەرگە وتە تانىمال، سەبەبى ول ەيفەل مۇناراسىنىڭ ەڭ جاقسى كورىنىسىن ۇسىنادى.
اۆتور
ورالحان قوجانوۆ
