پاريج وليمپياداسىندا باق سىنايتىن يسلام ساتپايەۆتىڭ قانداي جەتىستىكتەرى بار

استانا. KAZINFORM - سپورتشىلاردىڭ باستى ارمانىنا اينالعان پاريج وليمپياداسى كۇن ساناپ جاقىنداپ كەلەدى. الەمدىك ءدۇبىرلى دوداعا قاتىساتىن ساڭلاقتارىمىزدىڭ ءبىرى - نىسانا كوزدەۋدەن ەل نامىسىن قورعايتىن - يسلام ساتپايەۆ.

ول پاريج وليمپيادا ويىندارىندا نىسانا كوزدەۋدەن قازاقستان ءۇمىت ارتاتىن باستى سپورتشىلاردىڭ ءبىرى. جەرلەسىمىز ءتورتجىلدىقتىڭ باستى دوداسىنىڭ جولداماسىنا 2023-جىلى باكۋدە وتكەن الەم چەمپيوناتىندا قول جەتكىزگەن بولاتىن.

ساتپايەۆ 1998-جىلى 21- قىركۇيەكتە الماتى قالاسىندا دۇنيەگە كەلگەن. نىسانا كوزدەۋمەن 13 جاسىنان باستاپ اينالىسىپ كەلە جاتىر. قازىرگى جەكە باپكەرى - گەننادي ناسونوۆ.

ەندى ءار جىلدارداعى جەتىستىكتەرىنە جەكە-جەكە توقتالىپ وتسەك.

حاڭجوۋداعى جازعى ازيا ويىندارىنىڭ قولا جۇلدەگەرى (ارالاس جۇپتىق سىن، 2023-جىل)؛

الەم كۋبوگىنىڭ 2 دۇركىن كۇمىس جۇلدەگەرى (دجاكارتا، 2023 جىل)؛

الەم كۋبوگىنىڭ 2 دۇركىن قولا جۇلدەگەرى (دجاكارتا، 2023-جىل؛ باكۋ 2022-جىل)؛

كوماندالىق سىندا ازيا چەمپيونى (چحانۆون، 2023-جىل)؛

ازيا چەمپيوناتىنىڭ قولا جۇلدەگەرى (ارالاس جۇپتىق سىن، تەگۋ، 2022-جىل)؛

ۆينتوۆكامەن 10 مەتردەن نىسانا كوزدەۋدەن قازاقستان رەكوردسمەنى (باكۋ، 2023-جىل)؛

يسلام ساتپايەۆ پاريج وليمپياداسىنىڭ جولداماسى ساراپقا سالىنعان 2023-جىلىعى باكۋدە وتكەن الەم چەمپيوناتىندا پنيەۆماتيكالىق ۆينتوۆكامەن 10 مەتردەن نىسانا كوزدەۋدىڭ فينالىندا 4-ورىنعا تۇراقتادى.

ەستەرىڭىزگە سالا كەتەيىك، فرانتسيا تورىندە الاۋى تۇتاناتىن XXXIII جازعى وليمپيادا ويىندارى وسى جىلدىڭ 26- شىلدەسى مەن 11- تامىزى ارالىعىندا وتەدى. وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور كۇنسۇلتان وتارباي