پاريج وليمپياداسى: سانعا ەمەس، ساپاعا ءمان بەرىلەدى

استانا. KAZINFORM - تۋريزم جانە سپورت ءمينيسترى ەرمەك مارجىقپايەۆ فرانسيانىڭ قازاقستانداعى توتەنشە جانە وكىلەتتى ەلشىسى ديدە كانەسسپەن كەزدەسىپ، پاريج وليمپياداسىنا دايىندىق بارىسىن تالقىلادى.

قازىر قازاقستان ۇلتتىق قۇراماسىنىڭ قورجىنىندا سپورتتىڭ 8 تۇرىنەن 19 ليتسەنزيا بار. ازىرگە ساداق اتۋدان – 4، ۆەلوشوسسەدەن – 3، نىسانا كوزدەۋدەن – 5، قازىرگى بەسسايىس پەن بوكستان ەكى-ەكىدەن، گرەك-ريم كۇرەسى، ەركىن كۇرەس پەن سپورتتىق گيمناستيكادان ءبىر-ءبىر جولداما بۇيىردى.

ەرمەك مارجىقپايەۆتىڭ ايتۋىنشا، بۇل كورسەتكىش توكيو وليمپياداسىمەن سالىستىرعاندا تومەن. سول ۋاقىتتا سپورتشىلارىمىز 30 جولدامانى جەڭىپ العان.

- الداعى ۋاقىتتا ءالى 60 قا جۋىق ليتسەنزيالىق تۋرنير بار. بۇل جارىستاردا ءساتتى ونەر كورسەتىپ، ليتسەنزيالاردىڭ سانىن 70 تەن اسىرۋ كوزدەلىپ وتىر. اسىرەسە، الداعى كۇندەرى يتاليادا وتەتىن تۋرنيردە بوكسشىلارعا زور سەنىم ارتىلۋدا. جالپى، توكيو وليمپياداسىمەن سالىستىرعاندا جولداما سانى از بولادى. ءبىراق، ءبىز ساپاعا ءمان بەرىپ وتىرمىز، - دەدى مينيستر.

فرانسيانىڭ قازاقستانداعى توتەنشە جانە وكىلەتتى ەلشىسى ديدە كانەسس قازاقستاندىق سپورتشىلاردىڭ پاريج وليمپياداسىندا ءساتتى ونەر كورسەتۋىنە تىلەكتەس ەكەنىن ايتىپ، وليمپيادا بويتۇمارىن تابىس ەتتى.

- پاريج وليمپياداسى فرانسيا مەن قازاقستان اراسىنداعى دوستىق قارىم-قاتىناستى نىعايتا تۇسەدى دەگەن سەنىمدەمىن. بۇعان دەيىن ەكى ەلدىڭ پرەزيدەنتتەرى كەزدەسىپ، ىنتىماقتاستىقتىڭ جارقىن ۇلگىسىن كورسەتكەن ەدى. سپورت بولسىن، وزگە دە سالالاردا باياندى بايلانىس جالعاسا بەرەتىنىنە سەنىم مول، - دەدى ەلشى.

ەرمەك مارجىقپايەۆ قازاقستان مەن فرانسيا اراسىنداعى تۋريستىك اعىمدى ودان ءارى ۇلعايتۋ ءۇشىن تىكەلەي رەيستەردى ىسكە قوسۋ جانە قازاقستان ازاماتتارىنا تۋريستىك ۆيزالار بەرۋ ءراسىمىن جەڭىلدەتۋ مۇمكىندىگىن قاراستىرۋدى ۇسىندى.

ايتا كەتەيىك، پاريج وليمپياداسى 26- شىلدە مەن 11- تامىز ارالىعىندا وتەدى. ءدۇبىرلى دوداعا الەمنىڭ 205 ەلىنەن 10 مىڭنان اسا سپورتشى قاتىسادى. پاريج تورىندە 32 سپورت تۇرىنەن 329 مەدال جيىنتىعى ساراپقا سالىنادى.