پاريج وليمپياداسى: ۇلتتىق قۇراما فورماسىنىڭ ەرەكشەلىگى قانداي
استانا. قازاقپارات – 26-شىلدەدە فرانسيا استاناسى پاريجدە XXXIII جازعى وليمپيادا باستالادى. قازاقستان رەسپۋبليكاسى ۇلتتىق قۇراماسى ءۇشىن سالتاناتتى كوستيۋم، سالتاناتتى- سپورتتىق، سپورتتىق كيىم جانە تۋ ۇستاۋشىلارعا ارنالعان فورما دايىنداعان ەدى.
وليمپيادالىق فورمانىڭ ديزاينى ارنايى كوميسسيانىڭ شەشىمىمەن بەكىتىلدى.
كوميسسيا قۇرامىنا وليمپيادا چەمپيوندارى مەن جۇلدەگەرلەرى، ب ا ق وكىلدەرى، قوعام قايراتكەرلەرى مەن ۇلتتىق قۇراما كوماندانىڭ سپورتشىلارى كىردى. كوميسسيا ەكى كەزەڭگە سوزىلعان كونكۋرستا ءۇش نوميناتسيا بويىنشا جەڭىمپازداردى انىقتادى:
1. «سالتاناتتى وليمپيادالىق فورما»
(سالتاناتتى كوستيۋم، سالتاناتتى-سپورتتىق كوستيۋم) - «ەكسكليۋزيۆ ستۋديو» ج ش س؛
2. «سپورتتىق وليمپيادالىق فورما» (سپورتتىق كوستيۋم) - Health Sport ج ش س؛
3. «تۋ ۇستاۋشىلارعا ارنالعان وليمپيادالىق فورما» - «ەكسكليۋزيۆ ستۋديو» ج ش س.
سالتاناتتى وليمپيادالىق فورما مەن تۋ ۇستاۋشىلارعا ارنالعان وليمپيادالىق فورمانىڭ ەسكيزدەرى وتاندىق ديزاينەرلەردىڭ جاساعان تۋىندىسى. سونداي-اق ۇلتتىق مادەنيەت پەن ءداستۇردى بەينەلەيتىن ۇلتتىق ويۋ-ورنەكتەردىڭ، تۇستەر ۇيلەسىمىن جانە باسقا دا رامىزدەردىڭ ەلەمەنتتەرىن قامتيدى.
وليمپيادالىق فورمانى تىگۋ بارىسىندا اۋا-رايىنا سايكەس كەلەتىن، ىلعال سىڭبەيتىن جەڭىل جانە اۋا وتكىزەتىن زاماناۋي جوعارى تەحنولوگيالىق ماتەريالدار پايدالانىلدى.
وليمپيادالىق فورما جيىنتىعى ەرلەر ءۇشىن 29 بىرلىكتەن، ايەلدەر ءۇشىن 30 بىرلىكتەن تۇرادى.
سالتاناتتى كوستيۋم
سالتاناتتى كوستيۋمدى سپورتشىلار مەن سپورت دەلەگاتسياسى وليمپيادا ويىندارىنىڭ اشىلۋ جانە جابىلۋ شەرۋىنىڭ سالتاناتتى بولىگىنە قاتىسۋ ءۇشىن پايدالانادى.
كوستيۋمدەر قىسقا جەڭمەن ارنايى تىگىلگەن. سەبەبى پاريجدەگى ويىنداردىڭ اشىلۋ سالتاناتىندا اۋا تەمپەراتۋراسى جوعارى بولادى دەگەن بولجام بار. سونىمەن قاتار، جازعى وليمپيادا ويىندارىنىڭ تاريحىندا تۇڭعىش رەت اشىلۋ سالتاناتى ستاديوننىڭ سىرتىندا سەنا وزەنىندە وتەدى. شەرۋگە 180 قايىق قاتىسىپ، جارىق شوۋى كورسەتىلەدى. ال 94 قايىقتا ويىندارعا قاتىساتىن 10,5 مىڭ سپورتشى ورنالاستىرىلادى.
ايەلدەردىڭ سالتاناتتى كوستيۋمىنە 8 ءتۇرلى كيىم (باس اكسەسسۋار (جيەك)، كويلەك، گالستۋك، بلەيزەر، شالبار، يۋبكا، شۇلىق، كروسسوۆكا) كىرەدى.
شەرۋگە ارنالعان ەرلەردىڭ كوستيۋمى 7 كيىمنەن تۇرادى (تاقيا، كويلەك، گالستۋك، شالبار، كۋرتكا، شۇلىق، اياق كيىم).
كوستيۋمدەردەگى ۇلتتىق ويۋ-ورنەكتىڭ ەلەمەنتتەرى تەك دەكوراتيۆتى عانا ەمەس، سونىمەن قاتار تاريحي سيمۆولدىق فۋنكتسياعا يە. ول الەمدى كوركەم قابىلداۋ مەن قازاقستاندىقتاردىڭ ەستەتيكالىق تالعامىن كورسەتەدى:
* «ءمۇيىز» بۋيۆول نەمەسە بۇعى سياقتى قۇدىرەتتى جانۋارلارعا ءتان كۇشتى، باتىلدىق پەن قورعانىستى بىلدىرەدى.
* «قوس ءمۇيىز» ىشكى بىرلىك پەن ۇيلەسىمدىلىكتى كورسەتە وتىرىپ، مۇيىزدەردىڭ سيمۆوليكاسىن كۇشەيتەدى.
* «قاز مويىن» سپورتتاعى بەيىمدەلگىشتىكتى باسا كورسەتە وتىرىپ، يكەمدىلىكتى، ەپتىلىك پەن راقىمدى بىلدىرەدى.
سالتاناتتى-سپورتتىق كوستيۋم
جيناق 4 بىرلىكتەن تۇرادى (سپورتتىق كوستيۋم، فۋتبولكا، كروسسوۆكا، شۇلىق) جانە «قاز مويىن»، «ءمۇيىز» جانە «قوس ءمۇيىز» ويۋ-ورنەكتەرىمەن بەزەندىرىلگەن. سپورتتىق جارىستار كەزىندە، سونداي- اق ماراپاتتاۋ راسىمدەرى كەزىندە كيۋگە ارنالعان.
سپورتتىق كوستيۋم
جيناققا 18 ءتۇرلى كيىم كىرەدى (جاتتىعۋ كوستيۋمى، سالتاناتتى كوستيۋم، جەل قورعاعىش، پولو فۋتبولكاسى 2 دانا، فۋتبولكا 2 دانا، شورتى، سپورتتىق شورت، كروسسوۆكالار، قالپاق، سپورتتىق ريۋكزاك، دوڭگەلەگى بار سومكە، دوڭگەلەكتەرى بار قول جۇگىنە ارنالعان ريۋكزاك، سۇلگى، شۇلىق 2 دانا، سلانتسىلار).
ۇلتتىق دەلەگاتسياعا ءتان ءستيلدى ايشىقتاي وتىرىپ، جاتتىعۋ كەزەڭىندە جانە وليمپيادا ويىندارىنىڭ جارىستان تىس كۇندەرى كۇندەلىكتى كيۋگە ارنالعان.
تۋ ۇستاۋشىلاردىڭ وليمپيادالىق كوستيۋمى
تۋ ۇستاۋشى ەرلەرگە ارنالعان سالتاناتتى كوستيۋم 4 بىرلىكتەن تۇرادى (سيۋرتۋك، شالبار، جىبەك كويلەك، باس كيىم - بورىك).
تۋ ۇستاۋشى ايەلدەردىڭ سالتاناتتى كوستيۋمىنە 2 كيىم (كەشكى كويلەك، باس كيىم - ساۋكەلە) كىرەدى.
كەسكىندەمەدە سالتاناتتى ەلەمەنتتەر قامتىلعان: ەرلەر كوستيۋمىندە ۇلتتىق ويۋ-ورنەكتەر كەستەلەنسە، ايەلدەر كوستيۋمىندەگى ساۋكەلە جارتىلاي باعالى تاستارمەن بەزەندىرىلگەن.
تۋ ۇستاۋشى ەرلەر مەن ايەلدەرگە ارنالعان سالتاناتتى كوستيۋمدەرى سپورتتىق جيناقىلىق پەن ۇلتتىق ەستەتيكاعا نەگىزدەلە وتىرىپ، تالعامپازدىق پەن كورىكتىلىكتى بەينەلەيدى.
تۋ ۇستاۋشىلاردىڭ سالتاناتتى كوستيۋمى وليمپيادا ويىندارىنىڭ اشىلۋ جانە جابىلۋ شەرۋىنىڭ سالتاناتتى بولىگىنە قاتىسۋعا ارنالعان.
فورمانى ازىرلەۋ كەزىندە ديزاينەرلەردىڭ تۋىندىسىندا كەلەسى شارتتار ەسكەرىلگەنىن اتاپ وتكەن ءجون:
* باسقا ەلدەردىڭ تاجىريبەسى؛
* ۇلتتىق ەرەكشەلىكتەر؛
* زاماناۋي ءسان ترەندتەرى؛
* الدىڭعى وليمپيادالارمەن سالىستىرعاندا فورمانىڭ بىرەگەيلىگى؛
* قازاقستان تۋىنىڭ تۇسىنە تاۋەلسىز بولۋى؛
* اۋا رايى جاعدايلارى؛
* ۇلتتىق باس كيىم «تاقيا» قوسىلدى.
وليمپيادالىق فورمانى تىگۋ تولىعىمەن دەمەۋشىلەر قاراجاتى ارقىلى جۇزەگە اسىرىلدى. دەمەۋشىنىڭ اتى- ءجونى (ءوزىنىڭ سۇراۋى بويىنشا) سونداي-اق قايىرىمدىلىق سۋبەكتىسىنىڭ قۇقىقتارى مەن زاڭدى مۇددەلەرىن قورعاۋ ماقساتىندا قۇپيا بولىپ قالادى.
اۆتوركۇنسۇلتان وتارباي
