پاريج-2024: وليمپياداشىلار قانداي قوناقۇيلەرگە ورنالاسادى

استانا. KAZINFORM - فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنىڭ باستالۋىنا بۇگىن تۋرا 14 كۇن قالدى. بۇگىن تورتكىل دۇنيە كوز تىگەتىن ءتورتجىلدىق دودانى ۇيىمداستىرۋ كوميتەتى سپورتشىلارىمىز قوناقتايتىن وليمپيادا قالاشىعىن كورسەتتى.

وليمپيادا قالاشىعى كەلەسى اپتادان باستاپ، كەلۋشىلەرىن قارسى الا باستايدى. قالاشىقتىڭ اۋماعى 300 مىڭ شارشى مەتردى قۇرايدى. وندا پاريج وليمپياداسى جانە پاراليمپيادا ويىندارىنىڭ قاتىسۋشىلارى تۇراقتايدى.

الەمنىڭ 200 دەن استام ەلىنەن 15 مىڭعا جۋىق سپورتشىلاردى ورنالاستىراتىن عيمارات زاماناۋي جانە ءار ءتۇرلى پىشىندە نەگىزى قالانعان.

7 جىل ۋاقىت جۇمسالعان 80 نەن استام عيماراتتا 7200 بولمە بار.

ەستەرىڭىزگە سالا كەتەيىك، قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىز سوڭعى وقۋ-جاتتىعۋ جيىندارىن وتكىزىپ جاتىر.

قازاقستان قۇراماسى وليمپيادا ويىندارىنا سپورتتىڭ 25 تۇرىنەن 80 جولداما جەڭىپ الدى. ناقتىراق ايتساق، بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك-ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.

 

اۆتور كۇنسۇلتان وتارباي