پاريج-2024: وليمپيادا الدىنداعى الەمدىك رەيتينگتە قازاقستاندىق سپورتشىلار قاي ورىندا تۇر
استانا. KAZINFORM - ساناۋلى كۇندەردەن كەيىن، ناقتىراق ايتساق، 26-شىلدە كۇنى فرانسيا استاناسى پاريجدە XXXIII جازعى وليمپيادا ويىنداردىڭ الاۋى تۇتانادى. ءتورتجىلدىق دوداعا تورتكىل دۇنيە كوز تىگەتىنى انىق.
قازىر وليمپيادا ويىندارىنا قازاقستان قۇراماسى ليتسەنزيالار سانىن 80 گە جەتكىزدى. بۇل پاريج وليمپياداسى قازاقستاننىڭ تاۋەلسىز ەل رەتىندە قاتىسقالى وتىرعان سەگىزىنشى جازعى وليمپياداسى بولماق. سونداي-اق ەۋروپا قۇرلىعىندا ءۇشىنشى رەت (افينا، لوندون، پاريج) باق سىنايدى. وسى ورايدا ق ر ۇلتتىق وليمپيادالىق كوميتەتى اتاپ وتكەندەي، قازىرگى تاڭدا قازاقستان كومانداسى اتالعان باستى دوداعا سوڭعى جاتتىعۋ جيىندارىن وتكىزىپ جاتىر. وليمپيادا قارساڭىندا وتانداستارىمىزدىڭ الەمدىك رەيتينگتەگى ورنى دا بەلگىلى بولدى.
الەمدىك رەيتينگ كوپ جاعدايدا جەرەبە تارتۋ راسىمىنە اسەر ەتەدى جانە سپورتشىنىڭ جارىس الدىنداعى دەڭگەيىنەن حابار بەرەدى. ازىرگە، قازاقستان كومانداسى ساپىنان الەمدىك رەيتينگتە ءبىرىنشى ورىندا تۇرعان سپورتشى - ازامات داۋلەتبەكوۆ. ەركىن كۇرەستەن 86 كەلى سالماقتا سىنعا تۇسەتىن بالۋان ءبىرازدان بەرى تىزگىندى ەشكىمگە بەرگەن جوق. ازامات - سوڭعى الەم چەمپيوناتىنىڭ قولا جۇلدەگەرى.
وليمپياداعا قاتىساتىن تاعى ءبىر بالۋانىمىز الىشەر ەرعالي الەمدىك رەيتينگتە 8-ورىندا تۇر. ال پاريجگە جولداما العانى كۇنى كەشە بەلگىلى بولعان مەيرامبەك قارتباي ءوز سالماعىندا ءتورتىنشى ورىندا.
گرەك-ريم كۇرەسىنەن 60 كەلىدەگى ايدوس سۇلتانعالي العاشقى وندىققا ەنگەن جوق. 77 كەلىدەگى دەمەۋ جادىرايەۆ UWW تۇزگەن رەيتينگتە 7-ساتىعا تۇراقتادى. 87 كەلىدەگى نۇرسۇلتان تۇرسىنوۆ بەسىنشى ساتىدا.
تەننيستەن قازاقستان كومانداسىنىڭ ۇزدىگى ەلەنا رىباكينا WTA رەيتينگىندە 4-ورىندا كەلەدى. پاريجدە باق سىنايتىن تاعى ءبىر وتانداسىمىز يۋليا پۋتينتسيەۆا الەمنىڭ 38-راكەتكاسى سانالادى.
ەرلەر اراسىندا سىنعا تۇسەتىن الەكساندر بۋبليك اتر رەيتينگىندە 23-ساتىعا ورنالاستى. الەكساندر شيەۆچەنكو الەمدىك رەيتينگتىڭ 57-ورنىندا.
دزيۋدوشىلار اراسىنداعى ەڭ جوعارعى رەيتينگ ءابيبا ءابۋجاقىنوۆاعا (48 كەلى) تيەسىلى. ول وليمپيادالىق رەيتينگتە ۇزدىك ۇشتىكتى تۇيىقتاپ تۇر. ەرلەر اراسىندا ەڭ كوپ ۇپاي جيناعان ابىلايحان جۇبانازار (81 كەلى) ونىنشى ساتىعا تۇراقتادى. ەلدوس سمەتوۆ (60 كەلى) رەيتينگتە 22-ورىندا.
سەمسەرلەسۋدەن الەمدىك رەيتينگ ناتيجەسى وليمپيادا ويىندارىنىڭ جەرەبە تارتۋ راسىمىنە تىكەلەي اسەر ەتەدى. كوماندالىق سىندا قازاقستان قۇراماسى الەمدىك رەيتينگتە 4-ورىندا.
ال جەكەلەي سىندا قازاقستاندىق سپورتشىلار اراسىنان رۋسلان كۋربانوۆ جوعارى ورنالاسقان. ول 12-ساتىدا. ەرلىك سەرتاي 35، ەلمير اليمجانوۆ 47، ۆاديم شارلايموۆ 65-ورىندا. سونداي-اق، ۆەلوسپورتتان قازاقستان كومانداسى وتكەن ماۋسىم قورىتىندىسى بويىنشا UCI رەيتينگىندە 19-ورىن الدى.
سپورتتىق گيمناستيكا وكىلى ناريمان كۋربانوۆ الەم كۋبوگى كەزەڭدەرىنەن سوڭ قۇرىلعان رەيتينگتە 2-ورىن يەلەنىپ، پاريج وليمپياداسىنا جولداما العان بولاتىن.
ەستەرىڭىزگە سالا كەتەيىك، فرانتسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.
اۆتور كۇنسۇلتان وتارباي
