پاريج-2024: قىرعىز بوكسشىسىنا سەكۋندانت بولعان وزبەكستاندىق جاتتىقتىرۋشى ماراپاتتالدى
پاريج. KAZINFORM - پاريجدەگى وليمپيادا ويىندارىندا قىرعىز بوكسشىسىنا كومەكتەسكەن وزبەك باپكەرى ماراپاتتالدى.
وسى ەڭبەگى ءۇشىن كورشى ەلدىڭ حالىقارالىق قوعامدىق بىرلەستىگى اكمال حاسانوۆتى «شىڭعىس ايتماتوۆ» مەدالىمەن ماراپاتتادى، دەپ حابارلايدى 24.kg.
«شىڭعىس ايتماتوۆ ىستىقكول فورۋمى» حالىقارالىق قوعامدىق بىرلەستىگىنىڭ باس حاتشىسى اسسول مولدوكماتوۆا وزبەك باپكەرىن «ادامگەرشىلىكتىڭ، تولەرانتتىلىقتىڭ جانە قوعامدىق ديپلوماتيانىڭ جوعارى دەڭگەيى ءۇشىن» ماراپاتتاۋ تۋرالى شەشىم 5 -تامىزدا قابىلدانعانىن حابارلادى.
- ادامگەرشىلىگى، باۋىرمالدىعى ءۇشىن اكمالعا راحمەت. ءبىز ونى باعالايمىز، قۇرمەتتەيمىز. ءسىزدىڭ (قىرعىزستانعا) كەلۋىڭىزدى اسىعا كۇتەمىز. ءسىز بارلىق ماقتاۋ مەن ماراپاتتارعا لايىقسىز،- دەدى ول.
ايتا كەتەيىك، 4-تامىزعا قاراعان ءتۇنى قىرعىز بوكسشىسى مۋناربەك سەيتبەك ۋۋلۋ پاريجدە ءوتىپ جاتقان جازعى وليمپيادا ويىندارىندا امەريكالىق حارۆي دجامالعا قارسى شيرەك فينالدىق كەزدەسۋ وتكىزىپ، جارتىلاي فينالعا شىققان بولاتىن. جەكپە-جەك بارىسىندا وعان وزبەكستان دەلەگاتسياسىنان كەلگەن باپكەر اكمال حاسانوۆ سەكۋندانت بولدى.
جەكپە-جەكتى مۋناربەكتىڭ جەكە باپكەرى بەگاناس سۇلتانبايەۆ ەكراننان تاماشالادى. جەلىلەردە تاراعان اقپاراتقا قاراعاندا، مۋناربەكتىڭ جەكە جاتتىقتىرۋشىسى بەگاناس سۇلتانبايەۆ اككرەديتاتسيا ماسەلەسىنە بايلانىستى پاريجگە بارا الماعان.
