پاريج-2024: قازاقستان قورجىنىنا 50-جولداما ءتۇستى
استانا. KAZINFORM - كوركەم گيمناستيكادان قازاقستان قۇراماسىنىڭ ۇزدىگى ەلجانا تانيەۆا تاشكەنتتە ءوتىپ جاتقان ازيا چەمپيوناتىندا پاريج وليمپياداسىنىڭ جولداماسىنا قول جەتكىزدى. بۇل ەل قورجىنىنا تۇسكەن 50-جولداما.
وتانداسىمىز كوپسايىس قورىتىندىسى بويىنشا 133.40 ۇپاي جيناپ، ءبىرىنشى ورىنعا يە بولدى. جارىس ەرەجەسى بويىنشا، كۆوتا تەك قانا التىن مەدال العان سپورتشىعا بەرىلەدى.
وسىلايشا ەلجانا تانيەۆا ازيا چەمپيوناتىنىڭ التىن مەدالىمەن بىرگە، وليمپيادا ويىندارىنىڭ جولداماسىن دا جەڭىپ الدى.
تاعى ءبىر قازاقستاندىق سپورتشى ايبوتا ەرتاي قىزى جارىستى بەسىنشى ورىنمەن اياقتادى.
ەستەرىڭىزگە سالا كەتەيىك، وسىعان دەيىن كوركەم گيمناستيكادان ءوتىپ جاتقان ليسەنزيالىق ازيا چەمپيوناتىندا ەل قۇراماسى العاشقى جۇلدەسىنە قول جەتكىزگەنىن جازعان بولاتىنبىز.
اۆتور كۇنسۇلتان وتارباي
