پاريج-2024: قازاقستان قۇراماسىنداعى ەڭ جاس جانە ەڭ ەگدە سپورتشى كىم
استانا. KAZINFORM - فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىندا ەل نامىسىن قورعايتىن سپورتشىلاردىڭ ەڭ جاسى كىشىسى 17 جاستا بولسا، ەڭ ەگدەسى - 37 جاستا.
ەڭ جاس سپورتشى تاەكۆوندوشى - باتىرحان تولەۋعالي. ونىڭ جاسى نەبارى - 17 جاس. ال ەڭ ەگدە سپورتشىنىڭ جاسى بيىل 37 گە تولىپ وتىر.
ول - سەمسەرلەسۋ سپورتىنان سىنعا تۇسەتىن ەلمير ءالىمجانوۆ.
سونىمەن قاتار نازارلارىڭىزعا ۇلتتىق قۇراما سپورتشىلارى جايلى 10 دەرەك ۇسىنامىز.
- جالپى قازاقستان قورجىنىندا 25 سپورت تۇرىنەن 80 سپورتشىدا 92 ليتسەنزيا بار. ەڭ كوپ ليتسەنزيانى بوكسشىلار جەڭىپ العان (10 ليتسەنزيا).
- پاريج وليمپياداسىنا باراتىن 54 اتلەت جازعى ويىندارعا العاش رەت قاتىسقالى وتىر.
- برەيكينگ پەن بادمينتوننان قازاقستان ءبىرىنشى رەت وليمپيادا جولداماسىن يەلەندى. برەيكينگتەن ءامىر زاكيروۆ، بادمينتوننان دميتري پانارين ەل نامىسىن قورعايدى.
- سەمسەرلەسۋدەن قازاقستان قۇراماسى تاريحتا العاش رەت كوماندالىق جارىستا باق سىنايدى.
- بوكستان قازاقستان ايەلدەر قۇراماسى ءبىرىنشى رەت جازعى ويىندارعا ءۇش سپورتشى اپارادى.
- قازاقستان العاش رەت گيمناستيكانىڭ ءۇش تۇرىنەن (باتۋتتاعى، سپورتتىق جانە كوركەم) جازعى وليمپيادادا سىنعا تۇسەدى.
- ەڭ جاس سپورتشى - 17 جاستاعى باتىرحان تولەۋعالي (تاەكۆوندو).
- ەڭ ەگدە سپورتشى - 37 جاستاعى ەلمير ءالىمجانوۆ (سەمسەرلەسۋ).
- قازاقستان قۇراماسىنىڭ ساپىندا جازعى ويىندارعا ءتورتىنشى رەت قاتىساتىن ەكى سپورتشى بار.
- ولار - جەڭىل اتلەت ولگا سافرونوۆا مەن اكادەميالىق ەسۋ شەبەرى ۆلاديسلاۆ ياكوۆليەۆ.
- ەلدوس سمەتوۆ (دزيۋدو)، كيريلل گەراسيمەنكو (ۇستەل تەننيسى) جانە ەلەنا پوتاپەنكو (قازىرگى بەسسايىس) وليمپيادا ويىندارىنا ءۇشىنشى رەت قاتىسقالى وتىر.
ەستەرىڭىزگە سالا كەتەيىك، فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىنا بەلگىلەنگەن.
ويىنعا الەمنىڭ 205 ەلىنەن 10500 سپورتشى قاتىسادى.
وندا 32 سپورت تۇرىنەن 329 مەدال جيىنتىعى ساراپقا سالىنادى.
اۆتور
كۇنسۇلتان وتارباي
