ارتىق سالماقتان ارىلۋدىڭ تاعى ءبىر ءتاسىلى

استانا. قازاقپارات - جىلى ۇيلەر مەن كەڭسەلەر ادامنىڭ سالماق قوسۋىنا ىقپال ەتۋى مۇمكىن، ال سالقىن اۋا رايى كەرىسىنشە، ارتىق سالماقتان ارىلۋعا كومەكتەسەدى،دەپ جازادى «ريا نوۆوستي».

بۇل مالىمەتتەر نيدەرلاند عالىمدارىنىڭ Trends in Endocrinology & Metabolism جۋرنالىندا جاريالانعان ەڭبەگىنەن الىنعان.

«ءبىز عيماراتتاردىڭ جىلى بولۋى ادامنىڭ دەنساۋلىعىنا وڭ اسەرىن تيگىزەدى، ال از عانا سۋىقتىڭ اسەرىنەن ادام اعزاسى ءبىراز كۇش-قۋاتىن جۇمسايدى دەگەن ۇيعارىم جاسادىق»، - دەيدى مااستريحت ۋنيۆەرسيتەتى جانىنداعى مەديسينالىق ورتالىقتىڭ قىزمەتكەرى دوكتور ۆاۋتەر ۆان ماركەن ليحتەنبەلت.

ءسال بۇرىن جاپوندىق عالىمدار سەلسيي بويىنشا 17 گرادۋس تەمپەراتۋرادا 6 اپتا بويى كۇنىنە ەكى ساعات ۋاقىت سۋىققا شىداعان ادامداردىڭ ماي قاباتىنىڭ ازايعانىن انىقتاعان.

ليحتەنبەلت باستاعان زەرتتەۋشىلەر توبى ءوز كەزەگىندە ادام اعزاسىنىڭ سۋىققا ۇزاق ۋاقىت بويى بەيىمدەلەتىنىن ايقىندادى.

زەرتتەۋگە ەرىكتى تۇردە قاتىسىپ، كۇنىنە التى ساعات بويى 15 گرادۋس سۋىقتا بولعان جانداردا قولايسىز جاعدايلاردا ادامنىڭ ومىرلىك ارەكەتىن قولداۋعا ارنالعان، «قوڭىر مايلار» دەگەن اتاۋعا يە مايلى ۇلپالار پايدا بولعان. سۋىق اۋا رايىندا وسى جىلۋ الماستىرعىش جاسۋشىلار «اق» مايلاردى - «زياندى» مايلاردى جويادى، سول سەبەپتى ادام قاتتى توڭبايدى، ءارى ارىقتايدى.

زەرتتەۋ مالىمەتتەرىنە سۇيەنسەك، جىلۋدىڭ اعزاسىنان بولىنۋىنە ادام جالپى ەنەرگياسىنىڭ ۇشتەن ءبىر بولىگىنە دەيىن جۇمساۋى مۇمكىن. عالىمداردىڭ پىكىرىنشە، ادام ازعاسى ءۇشىن فيزيكالىق كۇش-قۋاتىن جۇمساۋمەن قاتار، سۋىقتا كوبىرەك ءجۇرۋ اسا پايدالى.

«قىس مەزگىلىندە ادامنىڭ ىشكى تەمپەراتۋراسى سۋىق اۋا رايىنا بەيىمدەلىپ، جوعارىلايدى. الايدا، ءتۇرلى تەمپەراتۋرالاردىڭ اسەرىنىڭ از بولۋىنان ادامدار ماي باسۋ ءتارىزدى اۋرۋلارعا دۋشار بولۋى مۇمكىن. ونىڭ ۇستىنە، دەنەسىن ۇنەمى جىلى ورتادا ۇستاعان ادامنىڭ تەمپەراتۋرالىق وزگەرىستەرگە توزىمدىلىگى تومەن بولادى»، - دەيدى عالىمدار.