«Artsport» اينالاسىنداعى جەمقورلىق داۋى: بيۋدجەتكە قانشا شىعىن كەلدى
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ «Artsport» باعدارلاماسىنا بولىنگەن قارجىنى جىمقىرۋ كۇدىگىنە ىلىككەندەرگە قاتىستى سوتقا دەيىنگى تەرگەۋ امالدارىنىڭ اياقتالعانىن ايتتى.
«مەملەكەت باسشىسىنىڭ تاپسىرماسىن ىسكە اسىرۋ شەڭبەرىندە سىبايلاس جەمقورلىققا قارسى قىزمەت سپورتتى قارجىلاندىرۋ سالاسىنداعى جەمقورلىق تاۋەكەلدەرىن بولدىرماۋ ماقساتىندا مەملەكەتتىك ۇيىمدار مەن مەكەمەلەردىڭ قىزمەتىن تەكسەرۋدى جالعاستىرۋدا. جىل باسىنان بەرى سىبايلاس جەمقورلىققا قارسى قىزمەت 1,3 ميلليارد تەڭگە شىعىنمەن 59 قىلمىستىق قۇقىق بۇزۋشىلىقتى تىركەدى»، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتىندا.
وسى ورايدا انتيكور ارنايى جاتتىعۋ سەكسيالارىن قوسارلانعان قارجىلاندىرۋدىڭ، جالعان وقۋ-جاتتىعۋ جيىندارىنا جانە جان باسىنا شاققانداعى قارجىلاندىرۋعا بولىنگەن بيۋدجەت قاراجاتىن جىمقىرۋ ارەكەتتەرىن اشكەرەلەگەن.
«اتاپ ايتقاندا، تۋريزم جانە سپورت مينيسترلىگىنىڭ «سپورتتى دامىتۋ ديرەكسياسى» ر م ق ك بۇرىنعى ديرەكتورىنا، ونىڭ ورىنباسارىنا جانە باسقا تۇلعالارعا قاتىستى سوتقا دەيىنگى تەرگەۋ اياقتالدى. ولار «Artsport» باعدارلاماسىمەن بالالاردى وقىتۋ بويىنشا قىزمەتتەر كورسەتۋ شەڭبەرىندە بيۋدجەت قاراجاتىن جىمقىردى دەگەن كۇدىككە ءىلىندى. سونىمەن قاتار، «ازيا ويىندارى-2023» سپورتشىلارىنىڭ جابدىقتارىن، سپورتتىق قىزمەتتەردى، سپورتتىق جابدىقتاردى جانە ءىس-ساپار شىعىندارىن ساتىپ الۋعا بولىنگەن بيۋدجەتتىك اقشانى يەلەنۋدىڭ قوسىمشا ەپيزودتارى بەلگىلەندى»، - دەيدى ول.
اتالعان فاكتىلەر بويىنشا زالالدىڭ جالپى سوماسى - 746 ميلليون تەڭگە.
ەسكە سالا كەتەيىك، بىلتىر سىبايلاس جەمقورلىققا قارسى ءىس-قيمىل اگەنتتىگى Artsport جوباسىنىڭ قارجىسىن جىمقىرعان 4 ادام سوتتالعانىن حابارلاعان ەدى.
اۆتور
داۋلەت ىزتىلەۋ
