تانىمال تەلەجۇرگىزۋشى ءلايلا سۇلتان قىزى استاناداعى كىشكەنتاي اتتاسىنىڭ ۇيىنە باردى
تەلەجۇرگىزۋشى ل. سۇلتان قىزىنىڭ ايتۋىنشا، بيىل ماۋسىم ايىندا الەۋمەتتىك جەلىدەگى پاراقشاسىنا سۇلتان ەسىمدى ەر ازامات جاقىندا كىشكەنتايلى بولاتىنىن جانە ومىرگە قىز بالا كەلسە، نارەستەنىڭ اتىن ءلايلا دەپ قويۋدى جوسپارلاپ وتىرعانىن جازعان. ال شىلدە ايىندا نارەستە تۋعاننان كەيىن، بالانىڭ تۋۋ تۋرالى كۋالىگىنىڭ كوشىرمەسىن دالەل رەتىندە اتالعان پاراقشاعا قايتادان سالىپ جىبەرگەن.
وسى ورايدا، بۇگىن تانىمال تەلەجۇرگىزۋشى كىشكەنتاي ءلايلانى قۇتتىقتاۋ ءۇشىن قولىنا گۇلى مەن سىيلىعىن جانە ءبىر جىلعا جەتەتىندەي جورگەك تيەلگەن قوراپتى الىپ، ەلوردانىڭ سول جاعالاۋىنداعى تۇرعىن ۇيلەردىڭ بىرىنە ارنايى باردى. ءلايلا سۇلتان قىزىن وزدەرىنىڭ پاتەرىندە بالانىڭ اتا- اناسى سۇلتان مەن جادىرا كۇتىپ الدى.
«وسىنداي وقيعانىڭ ءوزى ەلگە ۇلگى بولاتىنداي دەپ ايتا الامىن. مۇنداي وقيعالار ادامداردى جاقىنداستىرا تۇسەدى. كوپ ادامدار «حات جازدىم، ءبىراق ونى وقىمايدى» دەپ ويلايدى. سىزدەردىڭ وسى قۋانىشتارىڭىز جايىندا وقىپ، وتە ريزا بولدىم. كىشكەنتاي قىزدارىڭىز ماعان ۇقساسىن دەپ ەسىمىن دە ءلايلا دەپ اتاعاندارىڭىزدى ەستىپ، كوز جاسىما ەرىك بەردىم. سىزدەر حاتتى وتە اسەرلى ەتىپ جازعانسىزدار»، - دەدى جۋرناليست ل. سۇلتان قىزى.
پاتەرگە كىرگەن بويدا تەلەجۇرگىزۋشى ەكى ايلىق ءلايلانى قولىنا الىپ، ىستىق ىقلاسىن ءبىلدىرىپ، اق باتاسىن بەردى.
ايتا كەتەيىك، قىزدىڭ اكەسى 31 جاستاعى سۇلتان مۇحيت ۇلى ەلورداعا 8 جىل بۇرىن تارازداعى اسكەري بولىمنەن قىزمەتى بويىنشا اۋىسىپ كەلگەن. 2015 -جىلى ۇيلەنىپ، قازىر زايىبى جادىرا ەكەۋى ءتورت بالانى تاربەلەپ وتىر. قازىر ول استانا ماڭىنداعى اسكەري بولىمدە قىزمەت ەتىپ جاتىر.
«ۇلكەن بالامنىڭ ەسىمىن اكەم قويدى، ەكىنشى قىزدىڭ اتىن ناعاشى جاعى بەردى، ال ءۇشىنشى بالانىڭ ەسىمىن قارىنداسىم قويدى. وسىدان كەيىن اۋىلداعى اكەمە تەلەفون شالىپ، كىشى قىزىمنىڭ ەسىمىن ءلايلا سۇلتان قىزى دەپ اتاۋعا رۇقسات سۇرادىم. اكەم ەش قارسىلىق بىلدىرمەي، وسى شەشىمگە باتاسىن بەردى. قىزىمىز جاقسى ادامعا ۇقساسىن دەگەن نيەتپەن بالانىڭ اتىن ءلايلا دەپ قويدىق. بالانى ەمحاناداعى جوسپارلى تەكسەرۋگە اپارعان كەزدە، دارىگەرلەر تۋۋ تۋرالى كولىكتى اشىپ، قىزىمنىڭ ەسىمى تانىمال تەلەجۇرگىزۋشىنىڭ اتى- جونىنە ۇقساس ەكەنىن كورىپ تاڭدانىپ جاتادى. بۇگىن ءلايلا سۇلتان قىزى ارنايى ءبىزدىڭ شاڭىراققا كەلىپ، قۇتتىقتاپ جاتقانىنا وتە قۋانىشتىمىز»، - دەدى سۇلتان.
ءوز كەزەگىندە تەلەجۇرگىزۋشى ل. سۇلتان قىزى بۇل وتباسىنىڭ قازاقى تاربيەسىنە ءتانتى بولدى.
«قازىر جاستاردىڭ كەيبىرى ۇلكەندەردەن رۇقسات سۇراماي، بالانىڭ ەسىمىن وزدەرى قويىپ جاتادى. سوندىقتان، رۇقسات بەرگەن سۇلتاننىڭ قارت اتا- اناسىنا مىڭ العىس»، - دەدى جۋرناليست.
