شىعارماشىلىق ەمتيحان تاپسىراتىندار ءۇشىن ۇ ب ت- دا قانداي وزگەرىستەر بار

استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك كەلەسى جىلعى ۇ ب ت- دا بولاتىن ءبىرقاتار وزگەرىستەردى جاريا ەتتى، دەپ حابارلايدى قازاقپارات.

«بيىلعى تاعى ءبىر جاڭالىق شىعارماشىلىق باعىتتاردى تاڭداعان تالاپكەرلەرگە قاتىستى، ەندى ولار «قازاقستان تاريحى» مەن «وقۋ ساۋاتى» پاندەرىمەن قاتار «ماتەماتيكالىق ساۋاتتى» مىندەتتى ءپان رەتىندە تاپسىرادى. «ماتەماتيكالىق ساۋاتتان» تەست تاپسىرمالارى ومىردە ماتەماتيكالىق لوگيكا بويىنشا العان ءبىلىمىن، داعدىلارىن قولدانا الۋىن تەكسەرۋگە باعىتتالعان، سوندىقتان بۇل ءپان بارلىق تەستكە تاپسىرۋشى ءۇشىن مىندەتتى» دەپ اتاپ ءوتتى مينيستر Telegram پاراقشاسىندا.

بەيىندىك پاندەردىڭ كومبيناتسياسى بويىنشا دا وزگەرىستەر بار.

وقۋشىلاردىڭ، اتا-انالاردىڭ جانە پەداگوگيكالىق قاۋىمنىڭ ۇسىنىسىن ەسكەرە وتىرىپ، «B059 - كوممۋنيكاتسيالار جانە كوممۋنيكاتسيالىق تەحنولوگيالار»، «B055 - ماتەماتيكا جانە ستاتيستيكا»، «B063 - ەلەكتروتەحنيكا جانە اۆتوماتتاندىرۋ» ءبىلىم باعدارلامالارىنىڭ توپتارىنا تۇسۋشىلەر «ماتەماتيكا-ينفورماتيكا» كومبيناتسياسىن تاپسىرادى.

«قورىتىندىلاي كەلە، وتكەن جىلى ق ر عىلىم جانە جوعارى ءبىلىم مينيسترلىگى نەگىزگى ۇ ب ت- نى ەكى رەت تاپسىرىپ، ۇزدىك ناتيجەمەن گرانت تاعايىنداۋ كونكۋرسىنا قاتىسۋ مۇمكىندىگىن رەسمي تۇردە بەكىتكەنىن ەسكە سالعىم كەلەدى. ەگەر اقىلى نەگىزدە ءتۇسۋ ءۇشىن ۇ ب ت تاپسىرۋدىڭ تاعى ءۇش مۇمكىندىگى بار ەكەنىن ەسكەرەتىن بولساق، وندا 2024-جىلعى تالاپكەرلەر تەستىلەۋدەن بەس رەت وتە الادى. بۇل وزگەرىستەر ەمتيحاننان ءساتتى ءوتىپ، ماقساتىڭىزعا جەتۋگە كومەكتەسەدى دەپ ۇمىتتەنەمىز. بولاشاقتا جاڭا مۇمكىندىكتەر ءۇشىن ءبىلىم بەرۋ جۇيەسىن جەتىلدىرۋ جۇمىسى جالعاسىن تابادى» دەيدى ساياسات نۇربەك.

ەسكە سالا كەتەيىك، ءبىز بۇعان دەيىن كەلەسى جىلى ۇ ب ت- عا جاڭا سۇراقتار قوسىلىپ، ەمتيحان تاپسىرۋ ۋاقىتى 30 مينۋتقا قىسقاراتىنىن حابارلاعان ەدىك.